Kalaallit Nunaanni Sulisitsisut pisortaat suliunnaalersoq
Pisortaq Brian Buus Pedersen Kalaallit Nunaanni Sulisitsisut pisortaattut ukiuni qulingiluani sulereerluni taamaatilerpoq.
Brian Buus Pedersen nulianilu ukiut 30-t sinnerlugit Kalaallit Nunaanni najugaqareerlutik ukiamut Danmarkimut nuunniarlutik aalajangersimapput.
Brian Buus Pedersenip taamaammat nalunaarutigisimavaa, atorfimminit 2020-mi novemberip aallaqqaataani soraarniarluni, Kalaallit Nunaanni Sulisitsisut siulersuisuini siulittaasup Henrik Lethip tusagassiorfinnut nalunaarutaani atuarneqarsinnaavoq.
Aalajangerneq ajuusaarutigineqartoq
- Sulisitsisut siulersuisuini ajuusaarutigineqarpoq, Brian Buus Pedersenip ukiorpassuarni suleqataalluareerluni soraarniuteqarnera, Henrik Leth allappoq.
Brian Buus Pedersenip Sermitsiaq.AG-mut ilisimatitsissutigaa, aalajangerneq "imatut persuarsiorani" pisimasoq.
- Nuliaralu nutaamik pisoqartariaqartoq aalajangersimavugut. Allaffimik suliffissarsiorsimanngilanga, pisortaq 60-inik ukiulik, siunissami suliffigisinnaasani eqqarsaatigalugu qaammatini aggersuni eqqarsaasersorniarpoq.
- Kalaallit Nunaanni Sulisitsisuni suleqatikka kajumissuseqarluarnartumik suleqatigilluarsimavakka, Brian Buus Pedersen erseqqissaavoq.
Suliffeqarfiup eqaattumik tunniunneqarnissaa aamma Brian Buus Pedersenip Sulisitsisut sinnerlugit tatigisisatut atorfiata allamit isumagineqalernissaa siunnertaralugit Kalaallit Nunaanni Sulisitsisuni atorfiup inuttalerneqarnissaa siulersuisunit pilersaarusiorneqarpoq, tusagassiorfinnut nalunaaruteqarnermi allassimavoq.
Misilittagartooq
Pisortat namminersortullu suliffeqarfiini suliffeqartarnermik misilittagartooq matumani pineqarpoq.
Brian Buus Pedersen 2004-miit 2011-mut Tele-Postimi pisortaanerusimavoq. 1990-ikkunni Namminersorlutik Oqartussani allaffimmi pisortaasimavoq KNI-milu qullersaut allattaasimalluni, tassa atorfigisimasaasa ilaminiinnanngui.
Kalaallit Nunaanni sulinini aallartissimavaa, Namminersornerullutik Oqartussani Aningaasaqarnermut Pisortaqarfiup iluani Aningaasaqarnermut Pilersaarusiortarfimmi fuldmægtigitut.
Brian Buus Pedersen ullumikkut Kalaallit NunaanniAningaasaqarnermut Siunnersuisoqatigiinni aamma Aalisarneq pillugu Ataatsimiitialiarsumi ilaasortaavoq aamma Pinngortitaleriffiup siulersuisuini ilaasortaalluni.