Kalaallit Nunaat serverit kateriffiat
Demokraatinit Justus Hansenip paaserusuppaat, Kalaallit Nunaanni qarasaasiat ataatsimut attaveqarfiinik/serverpark pilersitsinissamik isuma naalakkersuisut qanoq igineraat
Serverit nillersartussaapput suliffeqarfiillu tamanna aningaasartuutigaat. Assersuutigalugu Facebook, illorsuarsuarmik sanatitsilluni aallartippoq Norgemi Luleå-mi qarasaasiani toqqortaatinut inissaqartitsiumalluni. Facebook oktobarimi nalunaarpoq Luleå toqqarneqarsimasoq illoqarfiup nillataartumik silaannaqarnera pissutigalugu. Nillertumik silaannaqarneq isumaqarmat, serverit pinngortitamit nillersarneqarsinnaasut, tamannalu nukimut atuinermit annikillisaataassaaq.
Luleåmut inissiineq aningaasatigut iluaqqutitaqarpoq Facebookimut, pinngortitamut/silap pissusaanut aamma Luleåmut. Naatsorsuutigineqarmat, Facebookip ukiuni tulliuttuni svenskit aningaasaat 3 aamma 4 milliarder akornanni qarasaasiani paasissutissat katersiviannut attatillugit atussagaat. Illoqarfimmi sanaartornermik sulialinnut suliffissat 300 nutaat pilersinneqassapput, illorsuassarlu naammassippat naatsorsuutigineqarluni, suliffiit ataavartut 50 - 60 akornaanni piulersimassasut.
Tamanna tunuliaqutaralugu Justus Hansen, Demokraatit, naalakkersuisunut paragraf 37 aqqutigalugu apeqquteqaateqarpoq; Kalaallit Nunaanni qarasaasiat ataatsimut toqqorteriffeqarfiinik pilersitsinissamik periarfissaq, naalakkersuisut qanoq igineraat aamma naalakkersuisut suliniuteqarnersut, IT'mik suliallit nunani allaneersut Kalaallit Nunaanni toqqorterivissanik pilersitsisinnaanermik periarfissaannik saqqummiussaqarsimanersut.
- Kalaallit Nunaanni silap pissusaa qarasaasiat toqqoriviinut aamma naleqqulluinnarpoq, taamaattumik soqutiginartippara Naalakkersuisut eqqarsaammut taamaattumut qanoq isumaqarnersut paasissallugu, Justus Hansen oqarpoq. Innersuussutigalugu Tele Greenlandip pisortaata 2008-mi danskit quppersagaannut Inginiørimut oqaatigisia.
"Kalaallit Nunaanni amigaatiginngisarput oqaatigissagutsigu tassaavoq nilleq. Serverit pitsaassusaat taamaaginnassappata nillorsarneqartuartariaqarput. Takorloorneqarsinnaavoq Kalaallit Nunaat siunissami qarasaasianut toqqorteriveqarfissuanngorsinnaasoq imaluunniit servereqarfissuanngorsinnaasoq. Nunani allani pissutsit qiviarutsigit, tamakkunani innaallagiamik mingutsitsisumik pilersuinermik pinngitsuuisinnaanngillat, nillorsaanissamut pisariaqartumut innaallagiaqarumallutik. Uagut nunatsinni imeq sumi tamani kuuinnarpoq avatangiisinut iluaqqutaasumik nukimmik pilersuiserisinnaasarput".