Kalaallit Nunaat soqutigivarput

Gebhard Reiner umiarsuaatileqatigiiffimmi HX-imi, siornatigut Hurtigruten Expeditionsimik taaneqartartumi, nutaamik pisortaavoq.

Timmisartorsuaq Airbus neo A330 Tuukkaq Nuummut siullermeerluni angalammat taanna ilaavoq, atoqqaarfissiortitsinermilu peqataalluni, periarfissarlu atorlugu HX-ip Nunatsinni suleqatai siunissamut pilersaarutit pillugit oqaloqatigalugit.

- Nuummut minnerput killitsinnartuuvoq, inuppassuit oqaluttuarisaanermi pisumut isiginnaariarlutik mittarfimmut takkussimasut takullugit. Københavnip Nuullu akornanni timmisartukkut attaveqarnerup atoqqaarfissiorneqarnerani peqataaneq, nunallu tamalaat akornanni angallannerup nutaap timmisartukkullu attaveqarnerup inuiaqatigiinnut periarfissat pilersitaasa nuannaarneq takullugu misigisaavoq immikkuullarissoq, maannalu tamakku tamarmik piviusunngornerat, Gebhard Reiner oqarpoq.

Nuummi nunanit tamalaanit miffigineqarsinnaasumik mittarfittaarneq pissutigalugu HX-ip illoqarfimmi suliffeqarfiit suleqatigerusuppai.

- Nunanit allanit toqqaannartumik timmisartuussisoqartalermat, siornatigornit ilaasut amerlanerulermata attaveqaasersuutillu pitsanngorsarneqarmata periarfissat nutaat pilersinneqarput. HX-ip suleqatissani nutaat ujartorniarpai, nunaqavissunillu suleqateqarusuppugut, tamannalu tamanut iluaqutaassaaq, Gebhard Reiner oqarpoq.

Hurtigruten Expressip takornariaqarnermut inatsit nutaaq isornartorsioraluarpaa, ukiukkullu takornariartitsisarnissamut millionikkaanik aningaasaliinissartik unitsikkallarusullugu, tamannali HX-imi pisortap Gebhard Reinerip ilumuunnginnerarpaa, tassami Kalaallit Nunaat HX-ip ornittagassaasa pingaarnersaasa tulliatut isigigamiuk.

Angalaneq Nuummiit aallartissaaq

HX Air Greenlandilu angallassinissamut sinaakkutissatut 2024-mi aasakkut isumaqatigiissuteqarput. Umiarsuarni takornariartaatini HX-ip umiarsuaanut innaallagiatorlutillu orsussamik ikummateqartut M/S Fridtjof Nansenimut imaluunniit M/S Roald Asmussenimut ilaasut taarsernissaanut Air Greenland 2025-mi ilaasunut inuttanullu 7.000-inut Københavnimiit Nuummut aamma Nuummiit Keflavikkimut angallassisartussatut isumaqatigiissutaalluni.

- Air Greenlandilu suleqatigiinnissamut ukiut marluk matuma siorna isumaqatigiissusiorpugut. Taakku uagutsinnut pingaaruteqarput, aamma piujuartitsineq, ilinniartitaaneq ilisimatusarnerlu eqqarsaatigalugit pingaartitavut assigiipput, Gebhard Reiner oqarpoq.

Umiarsuup M/S Fridtjofip ilaasumik Nuummi taarsiisarnera pissutigalugu angalaneq Nuummiit aallartittassaaq, tassanngaanniit Qeqertarsuup tunuanut iluliarsuarnik takuniaasoqartassaaq imaluunniit avannarpasinnerusumut Avanersuarmut, Kane Bassinimut Tunumullu ingerlaartoqartassalluni. 

- Angalanerit 2025-miit Nuummiit aallartittassapput, tamannalu ilaasunut ingerlaqqitsigatik ulluni marlunnik sivisunerusumik Kalaallit Nunaaniittalernissaannik kinguneqarpoq. Ingerlaqqitsigatik paasisassarsiorsinnaanngorlutik kulturi misigisinnaanngussavaat. Nunaqavissut suleqatigisavut paasisaqarfiginerusinnaallugit, Gebhard Reiner oqarpoq. 

Ilaasut sivisunerusumik Kalaallit Nunaanniinnissamik periarfissaqalerunik misigisassanik pisisinnaanngussasut Kalaallit Nunaanni, Islandimi Savalimmiunilu niuernermik aqutsisoq Laali Berthelsen oqarpoq.

 - Tikeraat sivisunermik nunamiissinnaalissapput misigisassanullu aningaasanik atuisinnaanngussallutik. Inuiaqatigiinnut ilaasunullu iluanaarutaavoq, maannalu uagut aamma misigisassanik periarfissanik nutaanik ineriartortitsileruttorluta. Umiarsuarni takornariartaatini ilaasut aallaqqitinnatik illoqarfimmi angalaartut takusarnerat sungiusimavarput, nunameeqqaarlutilli misigisassanik aningaasartuuteqaqqaartalernissaat qulakkeerniarparput, Laali Berthelsen oqarpoq.

 HX-ip Kalaallit Nunaanni ilisimasassarsiortunik angallassisarnera 2022-miit 2023-mut 73 procentimik amerleriarput. Ilisimasassarsiorlutik angalasut Kalaallit Nunaata sineriaani paasisassarsiornissartik, pinngortitap misiginissaa nunaqavissullu qanimut naapinnissaat periarfissaraat.

Nunaqavissunik suleqateqarneq

HX-ip Laali Berthelsen Kalaallit Nunaanni, Islandimi Savalimmiunilu niuernermut pisortatut atorfinitsinnikuuaa aamma sinerissami angalanerni kalaallinik takornarianik angallassisartunik atuisarluni.

Pisortap Gebhard Reinerip Kalaallit Nunaanni aningaasaliissutit qanoq amerlatigissanersut oqaatiginngilaa, oqaatigaali HX-ip nunaqavissut suleqatisererusukkai.

- HX-ip aningaasaliiniarluni pilersaarutai tassaapput sumiiffinni takornariartitsinermik suliaqartunik suleqateqarnissaq, soorlu Air Greenlandimik suleqateqarnerput taamaattoq. Taamatut isiginnittaaseqarluta sumiiffinni ingerlatsisunik suleqateqalerusuppugut, Gebhard Reiner oqarpoq.

HX-ip takornariarpassuaqalernissaq siunertarinngikkaa, akisussaassuseqarlunili pinngortitami misigisassarsiortitsisarneq pineqartoq nassuiaatigaa.

- Kalaallit Nunaat HX-imut ornigassaavoq pingaarutilik, angalanernillu pissanganartunik soqutiginartunillu ineriartortitseqataajumavugut. Takornariaqarneq ineriartortinniarlugu ikiuukkumavugut akisussaassuseqarlutalu Kalaallit Nunaat ukkatariniarlugu. Kalaallit Nunaanni takornariarpassuaqalernissaq siunertarinngilarput, akisussaassuseqarlutali taamaaliorpugut. Inuit alapernaatsut misigisassarsiorlutik angalarusuttut kulturinillu inuiaqatigiinnillu allanik misigisassarsiorusuttut Kalaallit Nunaannukarsinnaaqqullugit, Gebhard Reiner oqarpoq.

HX-ip aningaasaliinissatut pilersaarutai suliffeqarfik aqqutigalugu pissapput.

- Inunnut aningaasaliissaagut, Kalaallit Nunaanneersunillu inuttanik takornarialerinermik ilisimatuunngornissaat anguniarlugu ilinniartitsissalluta, Gebhard Reiner oqarpoq, inuusuttunillu suleqateqarusulluni eqqaavaa taamaaliornikkut takornarialerinerup qanoq ittuunera paasititsissutiginiassagamiuk.

- Inuusuttut suleqatiginissaat soqutigaavut, inuussutissarsiummik soqutiginnilersinniarlugit takornarialerineq pillugu qaammarsaavigalugit. Ilinniartitaaneq eqqarsaatigalugu una erseqqissarneqartariaqarpoq naak Kalaallit Nunaanni ilinniartitaaneq inuussutissarsiuteqarnerlu eqqarsaatigalugit takornarialerineq annertunerpaanngikkaluartoq, sulinermut atatillugu nunarsuarmi angalanissamik periarfissamik ammaasarmat. Inuusuttunut suliffissaqarnissamik pilersitsisarpoq, Kalaallit Nunaanniinnaanngitsoq nunarsuulli sinnerani aamma periarfissarpassuaqarluni, Gebhard Reiner oqarpoq.