Kalaallit Nunaata siunissaa Aajap ernumanartoqartippaa
Kalaallit Nunaanni ukiut tallimat qaangiuppata sulisinnaasut 3.000-it amigaatigineqalernissaat IA-p folketingimut ilaasortaatitaata Aaja Chemnitzip ernummatigaa, taassumalu innuttaaqatigiit katitigaanerat pillugu “ataqqinnittumik assigiinngitsunillu isumaqartumik oqallittoqarnissaa” ujartorpaa.
Sulisussaaleqisoqaraluartoq ukiumut inuit 300-t 400-llu akornanniittut Danmarkimut nuuttarput. Nuuttartullu ukiuni aggersuni amerliartornissaat Aaja Chemnitzip ilimagaa.
Folketingimut ilaasortap pissutsit taamaannerat ernumagai, inuunermilu atukkat ajorsiartuinnarnerat pissutaasorai, ilaatigut taallugit:
- Nioqqutissat akisunerusut
- Inissaaleqineq
- Peqqinnissaqarfimmi sullinneqarneq amigarsinnaasoq
- Atuarfiit ilungersunartorsiortut
Taanna aamma isumaqarpoq “politikkikkut oqaaserineqartut sakkortuut avissaartuutsitsisullu, assersuutigalugu kikkut kalaaliviunersut kalaaliviunnginnersulluunniit pillugit oqallittarnerit, sunniuteqarnerluttut”, taamalu oqallinneq isumaqatiginagu.
Asiamiut amerlanerusut
- Danmarkimi ilinniartutta angerlarniarlutik eqqarsaatigileraangamikku aamma tamanna eqqarsaatigisarpaat, Aaja Chemnitz Sermitsiaq.AG-mut oqarpoq.
- Ukiuni kingullerni tallimani inuit 1000-it Asiameersut Kalaallit Nunaannut nuupput, taakkualu innuttaasut amerlassusaasa nikiuinnerannut aalajangiisuupput. Innuttaasut katitigaanerat aamma maanna siunissamilu sulisussanik piginnaanilinnik amigaateqarneq pillugit ataqqinnittumik assigiinngitsunillu isumalinnik oqallittoqartariaqartoq, oqarpoq.
Ilanngullugu erseqqissarpaa inuusuttut ilinniagaqanngitsut suliffeqanngitsullu pillugit suliniuteqarnerusoqartariaqartoq.
Imminnut assortuuttut
- Inuusuttut 2.500-t ilinniagaqanngillat suliffeqaratilluunniit, uffalu siunissami sulisartut 3.000-t amigaatigineqartussaasut. Inuusuttut taakkua sulilersinnissaat tamaviaarutigigutsigu sulisartut amigaatigisagut pissarsiarisinnaagaluarpagut, Aaja Chemnitz oqarpoq.
Inuusuttut ilinnialeqqitsinniarlugit pinngitsaalineqarsinnaanngimmata, meeqqanut ulluunerani paaqqinnittarfinni atuarfinnilu siusinaartumik iliuuseqartarnissaq pingaaruteqartoq, isumaqarpoq.
- Inuiaqatigiit aningaasaqarnikkut imminut napatissinnaassut kissaatigaagut, taamaammat politikkikkut iliuuseqarnissaq pisariaqarpoq, Aaja Chemnitz erseqqissaavoq.