Qeqertarsuup eqqaani nunaqarfik Kangerluk maannakkut qulit missaannaanik inoqartoq takornarissanut immikkuullarissumik misigisassarsiortarfittut ineriartortissallugu piukkunnaateqarluartoq, takornariaq tyskeq misigisassarsiortartoq sapaatip akunnerata missaani Kangerlummi eqqaanilu qajarissamik misigisassarsioreerluni oqarpoq.
Uteqqittariaqartoq
Qeqertarsuup eqqaani nunaqarfik Kangerluk maannakkut qulit missaannaanik inoqartoq takornarissanut immikkuullarissumik misigisassarsiortarfittut ineriartortissallugu piukkunnaateqarluartoq, takornariaq tyskeq misigisassarsiortartoq sapaatip akunnerata missaani Kangerlummi eqqaanilu qajarissamik misigisassarsioreerluni oqarpoq.
Uteqqittariaqartoq
Christof Woltersdorf Tysklandimi Münchenimi najugartoq ulluinnarni qarasaasialerisutut atorfeqarfeqarpoq suliffimmilu saniatigut takornariartitsivimmi Norwind Reisenimi nunatsinnut takornarissanik angallassisartutut sulilluni.
Münchenimi ullut ulapaarfiusut qimalaarlugit nunatsinni pinngortitami misigisassarsiorluni angalaarnissani tassuma pingaartitaraa, ukiut kingulliit ingerlaneranni arlaleriarluni takornarissanik angallassilluni namminerlu takornarissatut angalalluni nunatsinniittarsimavoq. Qeqertarsuarmili pinngortitap kusanassusaa inuillu tikikkuminartuuneri eqqarsaataaniit katassinnaasimanngillat. Taamaattumik siorna ukiukkut Qeqertarsuarmiit Kangerlummut sisoraaserluni ullut qulit missaannik angalavoq ukiorlu januarimi sisoraaserluni ulluni ikittuinnarni Qeqertarsuarmi angalaaqqilluni.
Misigisassarsiorluni angalatooq siorna ukiorisseruttortoq martsimi nunaqarfimmut Kangerlummut uterlugulu 80 kilometerit missaanni sisoraaserluni ingerlaarnerani qamuteralannik ornillugu Sermitsiamiit inuilaarsuarmi angalanera pillugu apersorparput.
Kangerluk kangerlummi inissisimammat sineriak qajarissamik angallavigissallugu pitsaasuusoq, taanna isumaqarpoq.
Assilisaq: Christof Woltersdorf
- Qeqertarsuaq Kangerlullu Kalaallit Nunaata sinneranut naleqqiullugu allaaneruvoq alutornarlunilu, taamaattumik kingusinnerusukkut uteqqinnissara taamanikkulli aalajangiuppara, taanna oqarpoq.
Misigisaq immikkuullarissoq
Ukiuunerani marloriarluni Qeqertarsuaq Kangerlullu takoreeramigit, massakkut nunaqarfik Kangerluk aasaanerani tikissallugu aamma aalajangersimavoq, taamaattumillu juli aallartisimalertoq Qeqertarsuarmiit umiatsiamut ilaalluni Kangerlummukariarluni seqernup kaaviinnaarnerani sapaatip akunnerata missaani qajarissamik angalalluni tupermilu sinittarluni misigisassarsiorpoq.
- Siullermik Qeqertarsuarmiikkama ikinngutigillualersimasama arktisk adventure guidetut ilinniarsimasup Mark Mølgaardip umiatsiaaqqamik juli aallartilaartoq Kangerlummukaappaanga.
- Nunakkut pisunnissara qinersimasinnaagaluarpara ukiulli sisamat matuma siornatigut qajariaq misileqqaarakku nuannarilluinnalersimavara, taamaattumillu taanna atorlugu angalanissara toqqarsimallugu, peqqissiminngeqaangalu, taanna oqarpoq.
Ullut marluk Kangerlummeereerluni nunaqarfimmi ilisarisimalersimasani aappariit ukiunik 40-nngortorsiorlutik katiffissiortut peqataaffigisinnarlugit sineriak atuarlugu kangerlummut aallarpoq.
- Unnukkut tupereeraangama nunamut takusassarsiorlunga pisuttarpunga tupinnaannartumillu pinngortitarsuaq qaqqarsuarnit portusuunit avatangerneqarsimasoq kusanaqisorlu qimerloorujoorlugu.
- Tamannalu misigisaavoq immikkuullarissoq.
- Kangerluup eqqaani qanga inoqarfiusimasunik illukorpassuaqarpoq, inuillu tamaani najugaqarnissartik sooq toqqarsimammassuk paasilluarsinnaavara, Christof Woltersdorf oqarpoq.
Assilisaq: Christof Woltersdorf
- Aqqutaani ilaqutariit marluk eqalunniartut taamaallaat naapippakka, taaakkulu naapisimaalaariarlugillu ingerlaqqippunga, Christof Woltersdorf oqarpoq.
Piukkunnarluartoq
Nunaqarfik Kangerluk maannakkut qulit missaannaanik inoqarpoq, billeqannginnamilu nipaalluinnartumik avatangiiseqarpoq.
- Nunaqarfimmi arlalinnik illoqarpoq, taakkulu takornarissanut attartortittagassatut atorluarneqarsinnaapput, tupinnaannartumillu kusanartumik avatangiiseqarami takornarissanut misigisassarsiorfissatut ineriartortissallugu periarfissarissaarpoq.
- Maannakkut Münchenimut uteqqissaanga suliffinnilu sulileqqissallunga, kisianni maannaqqinnissara aalajangiutereerpara, tamatumuuna qaqqarsuarni sermersuit angalaarfigerusullugit, takornariaq angalatooq oqarpoq.
Christof Woltersdorf Tasiilami nunaqarfiinilu aamma misigisassarsiorluni angalanikuuvoq.
