Albatros
Arctic Circle Kangerlussuarmi takornariartitsinermi
neqerooruteqarujussuartartut maanna ilagaat.
Suliffeqarfiup sulisui 100-t
missaanniittut akunnittarfinni Polar Lodgemi, Kangerlussuaq Hotelimi aamma
angalusunut akunnittarfimmik Old Campimik ingerlatsisuupput.
Albatros
Arctic Circle Kangerlussuarmi takornariartitsinermi
neqerooruteqarujussuartartut maanna ilagaat.
Suliffeqarfiup sulisui 100-t
missaanniittut akunnittarfinni Polar Lodgemi, Kangerlussuaq Hotelimi aamma
angalusunut akunnittarfimmik Old Campimik ingerlatsisuupput.
Aamma
neriniartarfik aamma cafeteria mittarfimmiittut kiisalu neriniartarfik
Roklubben ingerlataraa. Taavalu tammajuitsorsiniartarfik akunnittarfinniittoq,
”den grønne bar” aamma nunanut allanut angalasunut cafeteria ingerlatarallugu.
Kiisalu sannaveqarput biilinik atortunillu allanik iluarsaassiffiusartumik.
Timmisartuussinerit
ilaneqartut
– 28.
novemberimiit pissutsit allaanerulissapput. Kangerlussuarmi ukiukkut
takornariaqarnermik suli ingerlatsivugut, tamannalu attatiinnarusupparput,
taamaattumik Nuummiit Kangerlussuarmut januaarip naaneraniit marsip
qiteqqunneranut immikkut timmisartuussisoqartalernissaa qulakkeersimavarput.
Marsillu qiteqqunneraniit sapaatit akunnerini 30-ni Jettime Københavnimiit
marloriarluni atlantikoq qulaallugu timmisartuussisassaaq, tamannalu
Kangerlussuup pisoqarfiunerulaarneranik kinguneqassalluni. Kiisalu Kangerlussuarmiit
Ilulissanut Sisimiunullu immikkut timmisartuussisoqartalernissaa, Air
Greenlandip Kangerlussuarmi timmisartuussinissamut pilersaarutaasa saniatigut,
Albatros Arctic Circlemi pisortaq Jørgen Larsen oqarpoq.
Nunaqarfimmi allannguineq
Kangerlussuup
takornarianut qitiusutut inissisimajunnaarluni takornarianut
ornigarneqarsinnaanerulernissaa ukiut tulliuttut ingerlaneranni pissasoq Jørgen
Larsenip nalilerpaa. Albatros Arctic Circle ullumikkut takornariat 10.000-it
missaanniittut Kangerlussuarmut tikittut sullittarpai, taakkulu suliffeqarfiup
ineriartorteqqinniarpai.
–
Kangerlussuarmi takornariat amerlanerulersinnaanerat nalilerparput. Ullumikkut
nioqquterput nuannarineqarnerpaaq tassaavoq illoqarfiit Ilulissat aamma
Kangerlussuaq ataatsimut takornariarfiginiarlugit angalasoqartarnera,
upperaarpullu Ilulissani nunat tamalaat akornanni mittarfik ammarneqarpat
illoqarfinni taakkunani marlunni takornariaqarneq malunnaatilimmik
allanngussasoq. Tamatuma saniatigut nioqqutinik nutaarluinnarnik
pissanganarnerusunik ineriartortitseqqammerpugut, taakkumi piumaneqarluarmata –
Kalaallit Nunaanniinnaanngitsoq nunarsuarmili tamarmi. Inuit
sulinngiffeqarlutik angalagaangamik misigisaqarusuttarput, Jørgen Larsen
oqarpoq, nioqqutissalli sorliit pineqarnersut oqaatigiumanngilaa.
Namminersorlutik
oqartussanit akerlilersorneqarneq
Qeqqata
Kommunia aamma Albatros Arctic Circle Kangerlussuup ineriartortinneqartuarnissaanut oqariartuuteqartarnerminni
nuna tamakkerlugu politikerinit akerlilersorneqarlutik misigisarlutik
oqartarput.
–
Ajoraluartumik Namminersorlutik Oqartussanit akerlilersorneqarneq annertooq
misigisarparput, tamannalu sumiiffinni amerlasuuni atuuppoq. Assersuutigalugu
umiarsuit Kangerlussuarmut tulannerminni Nuummut sanilliullugu pingasoriaammik
akiliisariaqarput. Apeqqutigineqarsinnaavorlu takornariaqarnerup
Kangerlussuarmit allamut nuunnissaanik kissaateqarneq pissutaanersoq? Tamatuma
saniatigut umiarsualiviup itinerulersinnissaanut suliaq kigaatsupilussuuvoq,
tamanna umiarsuit ilaasa tikittarnissaannut pisariaqartinneqarpoq.
Kangerlussuarmut ukioq manna tulattussaagaluit tamanna pissutigalugu
iluatsinngilaq.
Kangerlussuaq ineriartoqqilissaaq
Kangerlussuarmi
susassaqartoq alla tassaavoq Per Mikkelsen. Air Greenlandip timmisartunut
inissiisarfiani mekanikeritut sulinerup saniatigut aamma biilinik
attartortitsisartoq ilisimatusartunullu nunarsuarmit tamarmeersunut
assigiinngitsunik kiffartuussisartoq. Jørgen Larsen assigalugu Kangerlussuaq
attaveqaatit allanngortinneqarnerisa kingorna nukittunerulersinnaasoq taanna
naliliivoq.
–
Ukiuni kingullerni qulini ukiup annersaani sapaatillu-akunnerisa naanerini
tamani ulapaarsimavugut. Tamanna najugaqartunut tatisivoq, tassa timmisartut
ingerlariaqqissinnaanngikkaangata angalasunut piareersimajuartaratta.
Timmisartuussisarnerit allanngorpata eqqissisimanerulerluta
pilersaarusiornissaq piffissaqarfiginerulissavarput.
–
Isumaqarpunga novembarip 28-ata kingorna susoqanngeqqaarallassasoq, tassani
inuit paasiniaqqaassammassuk qanoq pisoqassanersoq. Tamatumali kingorna
1992-imi sakkutooqarfimmeersut tamarmik aallakaanerisa kingornatut siumukarneq
takussavarput. Qaammatini arlalinni inoqanngilaq, tamatumali kingorna
ingerlalluaqqilerpoq. Isumaqarpunga takornariaqarnermut, ilisimatusarnermut
illersornissamut tunngatillugu periarfissaqartoq, aamma isumaqarpunga
Kangerlussuaq inoqarfiulluarsinnaasoq. Ataqatigiilluareerpugut, taamaattumik
ineriartortitseqatigiissinnaalluta. Tamannali anguniarlugu Namminersorlutik
Oqartussat maani illuutitik inunnut tunniuttariaqarpaat. Illuutimmi
sumiginnarsimavaat aserfallatsaaliorsimanagillu. 1992-imiilli maani
aningaasanik atuisimanngillat.
Siunissaq
pillugu isumakuluutit
Mittarfiup
illuatungaani Vivip pisiniarfiani siunissaq neriulluarnarpallaanngilaq.
–
Pisiniartartukka takornariaannaanngillat, aammali Kalaallit Nunaannit tamarmit
aqqusaarlutik angalasut nunanullu allanut angalasut tunisutisiniarusuttut
pisisartoraakka. Ukiukkut aamma tammajuitsorsiniarluni piniartut,
qimusseriartut, maratonertartut aamma Arctic Circle Trailimi pisuttuartartut
pisisartuupput. Tassa amerlaqaat, angalasullu amerlasuut novembarip 28-ata
kingorna Kangerlussuaq aqqusaartarunnaassavaat, pisiniarfiutilik Vivi Schultz
Grønvold oqarpoq.
2025-mi
upernaamiit ukiap tungaanut nunanit tamalaanit timmisartuussisoqaannartarnissaa
nuannaarutigaa, ukiorli sivisoqisoq suli ernummatigaa. Ineqarnermummi
akiligassat suli akilerneqartartussaammata.
–
Tupinnartumik pisoqanngippat pisiniarfik matusariaqarsorivara. Maani
najugaqarneq nuannaraarput, ernerput aasaru meeqqat atuarfianni naammassissaaq,
taamaammat nuuttariaqalissagutta aatsaat aasaru pisinnaavoq. Tamannali
alianaqaaq, amerlaqaagummi ukiorpassuarni maani najugaqarsimasut.
