Kangerlussuup Sisimiullu akornanni takornariat ornittagaat nutaaq

Arctic Circle Road sikkilernermi aqqutit nuannarineqarnerpaat ilagilersinnaavaat, nittartakkami nunanit tamalaanit sikkilertut attaveqatigiittarfianni aqqutit nuannarineqarnerpaat ilaannut sanilliukkaanni: bikepacking.com-imi.

Sikkilernermik nuannarisaqartut Thomas Steinthal aamma Jørgen Wibe Kangerlussuarmi Russellip Sermersuata eqqaani Point 660-imiit Sisimiunut MTB-mik angalareerlutik oqarput. GPS naapertorlugu 206,5 kilometerit sikkilersimapput.

Russellip Sermersua aallarfissatut toqqarsimavaat, ilaatigut sumiiffiup kusanarnera pissutigalugu, aamma Jørgen Wibep oqarneratut, silap pissusiata allanngoriartornerata kinguneri ersarissumik takuneqarsinnaammata.

Ukiut tamaasa sermersuup aannerminit milliartornera sermillu sukkatsikkiartuinnarnera takuneqarsinnaasorujussuuvoq, Jørgen Wibe juulip 30-aniit aggustip arfernata tungaanut angalareerluni oqarpoq.

ATV-nut aqqutip periarfissaa

ATV-nut aqqut sikkilernermik nuannarisalinnut sunik periarfissaqarnersoq aperineqaramik, aqqut immikkuullarissoq, Issittup killeqarfia aqqusaarlugu ingerlammat silallu pissusiata allanngoriartorneranik oqaluttuassartaqarmat, avatangiisinut takornariarfissatut tulluartuunerarpaat.

– Aammattaaq aqqutikkoorluni kalaallit kulturiannik, aamma illoqarfiup nunaqarfiullu akornanni aqquserniorneq sumiiffimmi qanoq iluaqutaasinnaanersoq misigisassaavoq.

ATV-nut aqqut suliniummut annerusumut Arctic Circle Roadimut ilaavoq, taannalu Arctic Circle Trailimut pioreersumut, aasakkut pisuttuarfigineqarsinnaasumut ilaliussaavoq. Ukiukkut aqqut sisoraaserluni qimusserluniluunniit ingerlaarfigineqarsinnaavoq.

- Siullertut, aqqut sermersuarmit sinerissamut qaqqanik sumiiffinnillu silap pissusiata allanngoriartorneranit sunnerneqarluinnartunik oqaluttuaavoq, Jørgen Wibe aamma Thomas Steinthal oqarput, nangillutillu:

- Russelip sermersua aakkiartortut eqqaareerparput, immaqali suli pingaaruteqarneruvoq nunap ataani sermip aanngisaannartup aakkiartuaarnera, tamatumalu nunap qaqqallu sisoorsinnaanerannik sunnerpaa, sanaartornerillu tamarmik sunnerneqarput. Aammattaaq silap pissusiata allanngoriartornera pissutigalugu sumiiffimmi ukiup qanoq ilinerani silap allanngoriartorneranut sunniuteqarpoq, kangerluit pisarnermit kingusinnerusukkut qerisarlutik aasarlu siornatigornit siallernerulluni.

Jørgen Wibe aamma Thomas Steinthal oqaluttuarput aqqummik ilisimasaqarluartut oqaloqatigisimallugit, taakkualu maluginiarpaat 2018-imi 2019-imilu nunap immikkoortua panernersuaqarfiullunilu ikuallaffiusimasoq, ukiunili kingullerni sisamani siallerfiorujussuartoq.

Illoqarfiup nunaqarfiullu akornanni aqqut pingaarutilik

Soorliuna piffissaq nukiillu aqqusinermut atussagivut?

– Aap, maannakkut sammisassatta aappaa sammissavarput, tassa aqqusernup nunaqavissut iluaqutigisinnaasaat, Kalaallit Nunaanni illoqarfiit nunaqarfiillu aqqusernit siullersaannik ataqatigiilersitsisoq. Mittarfik Kangerlussuarmut atassuserneqarpat Sisimiut sinerissamut qanittumiittoq Kangerlussuullu nunanit tamalaanit tikinneqartartup akornanni ilisimasanik nukinnillu nuutsitsisarneq nutaarluinnarmik periarfissinneqassaaq.

– Pingaarneruvorli aqqusineq sumiiffimmut kajungernartuusinnaammat, inuussutissarsiutip takornariat pinngortitamut ataavartumik inuttullu attaveqarnermik periarfissaqartissinnaammagit, ilaatigut takornariarpassuarnit sunnerneqarnaveersaartillugit, soorlu Kalaallit Nunaanni illoqarfinni allani taama annertutigisumik tunuliaquteqanngitsuni taamaassimasoq, Jørgen Wibe oqarpoq.

Maanna sammisaq siulleq uterfigissavarput:

- Silap pissusiata allanngoriartornera pillugu oqaluttuassartaq pitsaanerpaaq tassaavoq takornarianut piujuartitsisumik, allanngoriartornermik namminneq takunnittuusinnaasunik, misigisassarsiortitsisoqarnissaa.

ATV-nut aqqusineq - sikkilerfissaalluarpoq allarpassuarnillu periarfissaqarluni - aqqusernillu tamaaniittunit alutorineqarnerulernissaa sulissutigineqarpoq.

– Taamaattumik kommunip aqqutip ukiuni aggersuni pitsanngorsarnissaanik aserfallatsaalinissaanillu pilersaarutai malinnaaffiginissaat pissanganarluinnassaaq – aqquserngup ujaraaqqanik sananeqartup marloqiusamik ingerlaarfillip, immaqa ullut ilaanni Kalaallit Nunaanni illoqarfiit marluk akornanni aqquserngup ilumoortup siulliup, tungaanut, Thomas Steinthal oqarpoq.

Umimmammik naapitsineq

Ilissi aqqummi ingerlaarnermi puiunaatsorsivisi?

- Misigisat alutornarnerpaat ilagaat qasunartumik qaqqamut majuareerluta umimmak angisooq qilammik tunuliaqutalik takuleriasaaratsigu, umimmaap meqqui anorimut aalaaluttut.

- Minutsialunni immitsinnut isigaavut, taava eqqissilluni allamut saappoq qimagullunilu. Isumaqarpugut umimmaat kunngiat naapillugu!

– Aammattaaq ullaakkut iterluni aputip tupermut nakkaanerata nipaa tusaallugu, silammut itsuarluni sermersuaq killeqanngitsoq takusinnaallugu puigunaatsuuvoq. Pisimasut tamakku allarpassuillu angalanermik puigunaatsumik pilersitsipput. Minnerunngitsumillu aqqutiip nipaassusaata ilisimaneqaatiminik misigititsinera, tassa sermimiit sineriammut.

– Qaqqat qooqqunngortut kangerlunngortullu takullugit, tassa qaqqap qaavanit Sisimiut qalipaatigissaartoq ungasissumit takusinnaaleratsigu, Jørgen Wibe aamma Thomas Steinthal oqaluttuarput.

Aqqutip pitsaassusaa

Aqqut qanoq ippa?

– Aqqusineq aallartilluarpoq, sermimiit Kangerlussuup umiarsualivianut allaat ujaraaqqanik qallerneqarsimavoq, tamatumalu kingorna aqqusineq maniilassivoq equngallunilu, sulilu naammassineqannginnerata malunnaatai ersillutik.

Sisimiunut aqqutaata qiteqqunnerani pissutsit unammillernarsipput.

- Aqqut masarluuvoq maralluulluni, sikkilillu arlaleriarlutik tigummiartariaqarlutik.

- Kingornatigut paasitinneqarpugut aasaq manna siallertorujussuusimanera imaluunniit nunap qeriuaannartup aakkiartulernerata sineriammut anngunnera — immaqa taakku marluk — pissutaasinnaasut.

– Sisimiunulli 15 kilometerit kingulliit ingerlaarfiulluarput, taamaalillunilu angalaneq naggaserluarneqarpoq, Jørgen Wibe oqaluttuarpoq, inerniliillunilu:

- Aqqutip 60 procentia siulleq pitsaalluinnarpoq, 15 procentialu kingulleq aamma taamaappoq, qeqqali ilaannikkut sialussuartarpoq.

– Nunarsuarmili tamarmi sikkilernermik nuannarinnittut ingerlaarfigisartagaat unammillernartortalinnut allanut sanilliukkaanni, sivisuumik masammiuunissaq inunnit annilaangassutigineqarneq ajorpoq. Uagut nammineq Islandimi aqquserngit ujaqqanik qallersimasut aqqutigalugit Kaukasusimilu qaqqarsuit aqqutigalugit sikkilernikuuvugut, tassanilu paasivarput nammattagalerluni sikkilerneq qanoq pissanganartigisinnaasoq, Thomas Steinthal oqarpoq.

Angalanerup sivisussusia

Ilinniartut taakkua marluk ulluni arfinilinni angalapput, sivisuumik ulloqeqqasiornissamut ullukkullu sinilaarnissamut, pinngortitamik eqqissisimanartumillu nuannaarutiginninnissamut piffissaqarniarlutik.

Sukkanerusumik ingerlasinnaagaluarlutik, ingammik sikkilitik qaqqasiorluni sikkilinik taarsersimasuugunikkit, paasissutissiipput.

Aqqusernup affaa sinnerlugu siullerni Arctic Circle Trailip aqqutaa aamma ATV-nut aqqut immikoorput, tamatumali kingorna naapipput.

- Taamaattumik unnuaq ataaseq illuaqqami nuannarineqarluartumi unnuivugut, unnuillu sinneri tuperni unnuisarluta, Jørgen Wibe aamma Thomas Steinthal oqaluttuarput, aqqutillu tamatuma ingeriartornissaa malinnaaffigissallugu pissanngatigalugu!

Ilinniartutut angalanissaq aningaasaliisoqarluni aatsaat pisinnaavoq, suliniummut oqaluttuamullu tapersersuisoqarneratigut. Aningaasatigullu ikiorserneqarnikkut.

Aningaasaliisut tassaapput Dansk Magisterforening, Friluftsland aamma GribGrab.