Kapisillit ineriartorfiusoq

Kapisilinni Nuup Kangerluaniittumi innuttaasut 2014-imi 71-iupput 2024-milu 41-nut ikileriarsimallutik. Nunaqarfimmi aalisakkeriveqanngilaq, inuusuttullu aalisartut amerlanerpaartaat Nuummut nuunnikuupput. Taamaakkaluartoq nunaqarfimmi aalisarnermik inuussutissarsiuteqarneq unissimanngitsoq, inuussutissarsiutillu allat ineriartortinneqartut arlaqarmata, siunissamut ernumanissamut tunngavissaqanngitsoq, nunaqarfimmi aqutsisuni ilaasortaq kiisalu kommunalbestyrelsimi ilaasortaq oqarput.

Allanik periarfissarissaartoq

Kapisillit eqqaani aalisagaqarluaraluartoq taamaattoq nunaqarfimmi aalisakkeriveqanngilaq, talittarfimmilu umiaatsiaaqqat amerlanngitsuinnaat takussaapput. Taamaakkaluartoq nunaqarfik kangerlummi aliannaalluinnartumiittoq inuussutissarsiornikkut allanik periarfissarissaarpoq. Nunaqarfiup akianiippoq savaateqarfik nunalerinermillu ingerlatsiviusoq nunatsinni tusaamaneqarluartoq Neriunaq Arcticfarm. Kapisilinni siornatigut aalisakkanut tunitsiveqarnikuugalarpoq, taannali maannakkut Neriunaq Arcticfarmimit pigineqarpoq, tassanilu savat tuttllu toqararneqartarput.

Nunaqarfimmi illut affaasa missaat aasarsiortarfittut atorneqarput, Nuummiillu Kapisilinnut 2 tiimit missaat atorlugit ingerlasoqarsinnaammat, illuaraatillit ukioq kaajallallugu nunaqarfimmut tikittarput. Aammali takornariaqarnikkut inerisaanneq aallartisarneqaleruttortoq, taamaattumillu siunissamut ernunaminnissamut tunngavissaqanngitsoq, nunaqarfimmi aqutsisuni ilaasortaq, Neriunaq Arcticfarmimik piginnittoq aamma tapertaralugu aalisartartoq Angutimmarik Hansen oqarpoq.

Aalisarneq uninnikuunngitsoq

Nuummi aalisakkanut suliffissuit unammilleqatigiittut pingasuupput, Kapisilinnilu aalisartut pisatik Nuummut tunigaangamikkit aningaasat amerlanerusut pissarsiarisaraat, nunaqarfimmilu aalisakkanut tunitsiveqartuuppat, tassani unammilleqatigiittoqanngimmat tunisinermi akigitiginneqartartoq appasinnerussasoq, Angutimmarik Hansen oqarpoq.

- Kapisilinni aalisartut inuusuttut amerlanerit Nuummut Nuunnikuupput, taakkuli aasaanerani bundgarnersorluni aalisarneq aallartikkaangat nunaqarfiup eqqaanut aalisariartarput amerlanerillu angajoqqaaminni najugaqartarlutik.

- Aammali nunaqarfimmi umiatsiaararsortut sinneruttut saarullinnik panertulisarput taakkulu tunisaalluartarput, taanna oqarpoq.

Taamaattumik nunaqarfimmi aalisakkanut tunitsiveqanngikkaluartoq aalisarnermik inuussutissarsiuteqarneq uninnikuunngitsoq, taassuma erseqqissaatigaa.

Ineriartorneq eqqumaffigineqartoq

Kommuneqarfik Sermersuumi kommunalbestyrelsimi Aningaasaqarnermut Inuussutissarsiornermullu Ataatsimiititaliami ilaasortaq Peter Davidsen, Siumut, naapertorlugu Kapisilinni inuussutissarsiutinik nutaanik inerisaanissaq kommunimit eqqumaffigineqarpoq.

- Ukiuunerani Kapisilinniik Nuummut tunisiartortarneq isumannaanerpaajunngilaq, taamaattumik aalisakkanut tunitsiveqartuuppat soorunami pitsaassagaluarpoq, tunitsiviliisoqarusuppallu kommunimiit tapersiinissarput qularutiginngilara.

- Kisiannili nunaqarfimmi unnuisarfiliornissamut siunertaqarluni nunaminertanik qinnuteqaatit akuersissutiginikuuagut, taamaattumik takornariaqarnermik inussuutissarsiuteqarnermi inerisaasoqarnera siunissamut neriullualersitsivoq, taanna oqarpoq.

Kapisilinni takornariaqarnermik inuussutissarsiuteqarnermi iluani inerisaanissamut pilersaarutit nunaqarfimmi innuuttaasunit tapersorneqartut, Peter Davidsen erseqqissaavoq.