Kielsenip aalisarnermut inatsit nutaaq pillugu akissutaa ersarluppoq
Aalisarnermut Piniarnermullu Naalakkersuisoq Kim Kielsen paragraf 37 naapertorlugu akissuteqaammini isumaqarpoq "aalisarnermut inatsisissatut siunnersuut sunniuteqarnerusumik aningaasarsiorluarnerusumillu aalisartoqalernissaanik nassataqassasoq". Akissuteqaammili tamatumani aamma eqqaavaa tassunga atatillugu piumasaqaat aalajangiisuusoq tassaasoq "naammassisaqarsinnaassutsip aamma pisuussutinut erniaritinneqartup ajorseriarsinnaanerisa pinngitsoortinneqarnissaat imaluunniit annikinnerutinneqarnissaat".
Aalisarnermut inatsit nutaaq inuussutissarsiummut, inuiaqatigiinnut nunattalu karsianut isertitassanut tunngatillugu qanoq kinguneqassava. Inuppassuit tamanna paasiuminaatsippaat, Kim Kielsenillu Demokraatineersumut Jens-Frederik Nielsenimut akissutaani oqariartuuteqarnera marloqiusatut ippoq.
Aalisarnermut inatsit nutaaq uumassusillit inuunerannik aningaasaqarnikkullu ataavartumik ingerlatsinissamik tunngaveqartoq Kim Kielsenip Jens-Frederik Nielsenimut akissummini erseqqissarpaa.
Suliniutit nutaat
Inatsisissatut siunnersuutip arlalinnik suliniutinik imaqarnera Kim Kielsenip tikkuarpaa, ukualu eqqaavai:
- Tassunga atatillugu assersuutitut taaneqarsinnaapput avataasiorluni qaleralinniarnermi, assagiarsunniarnermi aamma aqutsiveqarfik 47-mi sinerissap qanittuani qaleralinniarnermi, piumasunut, pisassiissutinik niuerutigineqarsinnaasunik nammineq pigisanik atuutsitsilerneq, kiisalu raajarniartut tamarmik pisassiissutimik 75%-ii angullugit tunisassiornissamut periarfissaqalersinneqarnerat, periarfissaq tamanna maannakkorpiaq avataasiorluni aalisartunut kisimi atuuppoq, paragraf 37 naapertorlugu taama akissuteqarpoq.
Jens-Frederik Nielsenip inuussutissarsiutinik piginnittut siammarterneqarnissaat pillugu apeqqutaanut allamut Kim Kielsen taama ingasaassitigisumik oqaaseqanngilaq, imalu allappoq „tamatumunnga atatillugu pingaaruteqartoq naammassisaqarsinnaassutsip aamma pisuussutinut erniaritinneqartup ajorseriarsinnaanerisa pinngitsoortinneqarnissaat imaluunniit annikinnerutinneqarnissaat“.
Jens-Frederik Nielsen toqqaannartumik aperivoq Naalakkersuisut "suliffeqarfimmut inuiaqatigiinnullu kingunissaanut
sunniutissaanullu tunngasunik Naalakkersuisut Polar Seafood Greenland
kisitsisinik aallerfiginikuuneraat“, tassami ingerlatseqatigiiffik pisassiissutinik annertuunik annaasaqarumaarmat.
- lnatsisissatut siunnersuummut nassuiaatini aningaasaqarnikkut kinguneqaatissanut tunngassuteqartoq, inuussutissarsiuteqartunut pisortanullu ataatsimut kinguneqaatissaannik nassuiaanissamik siunertaqarpoq. lngerlatseqatigiiffiit inuinnarnit pigineqartut ataasiakkaat kinguneqaatissaannik misissuinissamik suliaqarnissamut ilaanngillat, Naalakkersuisoq erseqqissaavoq.
Taamaattumik Royal Greenland ilanngunneqanngilaq
Namminersorlutik Oqartussat ingerlatseqatigiiffiutaat Royal Greenland "sooq inatsisissatut siunnersuummi suliniutissanut arlariinnut ilanngunneqarsimannginnersoq" Demokraatit siulittaasuata akissutissarsiniarpaa.
- Matumani suna tunngaviua, Jens-Frederik Nielsen aperivoq.
- Royal Greenland A/S ilisimaneqartutut Nunatsinni inuiaqatigiinnit tamanit pigineqarpoq. Pisassiissutit inuiaqatigiinnit pigineqartut ingerlatseqatigiiffinnut inunnulluunniit ataasiakkaanut tunniunneqarnissaat taamaammat aalisarnermi piginnittut siammarterneqarnissaannik kissaateqarnermut naapertuutinngilaq.
Akissummut ilassutigineqarpoq "Royal Greenland inuiaqatigiinnit tamanit pigineqartutut immikkut piumasaqarfigineqartartoq - siunissamilu aamma piumasaqarfigineqarsinnaassalluni".