ASSARTUINEQ
Kiffartuussinermi isumaqatigiissummut nutaamut akileraarutitigut aningaasat atorneqartut ima amerlatigipput
Namminersorlutik Oqartussat Royal Arctic Line kiffartuussinissamik isumaqatigiissuteqarfigaat, nunalerinermik inuussutissarsiuteqartunut assartuinermik umiarsuaatileqatigiiffik kiffartuussisinnaaniassammat, tamannalu ukiumut 1,2 millionit koruuninik naleqarpoq.
Nunalerinermi usinik assartuisoqartalernissaanut nunalerinermik inuussutissarsiortut qilanaarsinnaapput, Nammainersorlutik Oqartussat RAL-imut ukiuni tallimani atuuttussamik tapiissuteqartalissammata.
Toqqorsivimmit assilisaq: Neqi A/S
Royal Arctic Line ukiuni tallimani atuuttussamik kiffartuussinissamik isumaqatigiissuteqarfigineqartoq qanittukkut Aningaasaqarnermut Akileraartarnermullu Naalakkersuisoq Erik Jensen ilisimatitsivoq.
Aningaasaqarnermut Naalakkersuisoqarfik Sermitsiamut ilisimatitsivoq umiarsuaatileqatigiiffimmut ukiumut tapiissutit 1,2 millionit koruuniusut, taamaalillunilu piffissami tamarmi pisortat aningaasaataannik tapiissut 6 millionit koruuniullutik, tamannalu nunalerinermik inuussutissarsiuteqartut iluaqutigisinnaavaat.
Imminut pilersorneq pingaaruteqartoq
"Nunalerinermik inuussutissarsiorneq Kalaallit Nunaata kujataani inuussutissarsiutit ilusiligaanerannut pingaaruteqartunut ilaavoq, inuussutissanullu suliassaqarfimmi imminut pilersornerulernissap angunissaani suleqatissatut pingaaruteqartunut ilaalluni. Inuussutissarsiornerup ineriartortinneqarnissaa annertuumik pingaartipparput", Erik Jensen oqarpoq.
- Taamaattumik politikkikkut aaqqiissutissarsinissap iluatsinnera nuannaarutigisorujussuuarput, taamaalillutik nunaatillit naleqquttumik akeqartitsiviusumik usinik assartuussivigineqaqqissinnaalissallutik. Royal Arctic Linep nunaatilinnik sullissinissaq qulakkeersinnaagaa tatigisorujussuuarput. Taakkua suliassaq iluatsilluartumik siusinnerusukkut suliarisimavaat, Erik Jensen ilassuteqarpoq.
Royal Arctic Line nammineq umiarsuaatini atorlugit usinik assartuinerup ingerlannissaanut pisussaaffilerneqanngilaq, nassiussuisulli allat atorlugit suliamik suliarinnittarsinnaapput.
