Kiffartuussinermut isumaqatigiissutit sukannernerusumik nakkutigineqassasut

Pisortat ilaasunik angallassisarnerat qulakkeersinnaaniarlugu, 2021-mi januarimi atuutilersumik, ilaasunik angallassisarneq pillugu Namminersorlutik Oqartussat Air Greenlandimik, Disko Line-mik aamma Norland Air-imik, Kujataa minillugu, ukiuni qulini atuuttussamik isumaqatigiissusiorput.

Isumaqatigiissutit suliassaqarfinnut qulinut agguagaapput, taakkulu akeq qaffasinnerpaaq atorlugu angallassinissamut periarfissanik neqeroortarnissamik periarfissiipput.

Ukioq Inatsisartunut qinersisoqareernerata kingorna Demokraatit, Inuit Ataqatigiit, Siumup aamma Atassutip suleqatigiinnissamut isumaqatigiissutaanni sullissinissamut isumaqatigiissutit misissuiffigineqassasut ilaatigut isumaqatigiissutigineqarpoq.

Ilaasunillu angallassinermi kiffartuussinermi isuqamatigiissuteqarfigineqarsimasut kiffartuussinissamut isumaqatigiissutini pisussaaffimmik naammassinninnissaat qulakkeerniarlugu suliniutinik aallartitsisoqarnikuusoq Ineqarnermut Attaveqaasersuutinut, Isorliunerusunullu Naalakkersuisoq, Aqqaluaq B. Egede, Inuit Ataqatigiit, Inatsisartunut ilaasortap Anders Olsenip, Siumut, kiffartuussinissamut isumaqatigiissutit pillugit paragraf 37 atorlugu apeqquteqaataanut akissuteqarluni ilaatigut allappoq.

Sukannernerusumik nakkutilliineq

Kalaallit Nunaat tamakkerlugu ukiuni kingullerni ilaasunik angallassinermi unammilligassat annertuut ukioq Inatsisartunut qineqqusaarnerup nalaani annertuumik sammineqarput, sullissinissamillu isumaqatigiissutit nutaamik nalilersuiffigineqartariaqartut, taamanikkut Naalakkersuisunut siulittaasoq, maannakkullu Aningaasaqarnermut Akileraartarnermullu Naalakkersuisuusoq, Muté B. Egede, Inuit Ataqatigiit, taamanikkut ilaatigut oqarpoq.

Isumaqatigiissutinillu malinninnissamut piumasaqaatinik sukannernerulersitsinissaq siunertaralugu sullissisut killiffiit pillugit sapaatit akunnikkaartumik ataatsimeeqatigineqartarnissaat pilersaarutigineqartoq, Aqqaluaq B. Egede paasissutissiivoq.

- Tamatuma saniatigut Air Greenland A/S aamma Disko Line A/S kiffartuussinissamut isumaqatigiissutaat pillugit ataatsimeeqatigaakka, taamatullu pitsannguinissamut suliniuteqaqqullugit qinnuigalugit, taanna oqarpoq.

Kiffartuussinissamut isumaqatigiissutit piffissap qanoq ilinerani isumaqatiginninniutigineqaqqinnissaannut aalajangersagaqarpoq, tamannali suli tikinneqanngilaq.

- Kiffartuussinerli sukkut pitsannguiffigineqarsinnaanersoq aammalu suliniutit suut pisariaqartinneqarnersut pillugit sullissisut ingerlaavartumik oqaloqatigineqartarput.

- Kiffartuussinissamut isumaqatigiissutinut atatillugu inuiaqatigiinni aningaasaliissutit atorneqartut annertunerat, aningaasaliinermilu innuttaasut nunatsinni angalasinnaanerinik qulakkeerinissap siunertaanera Naalakkersuisuniit annertuumik eqqumaffigineqarpoq.

- Taamaattumik isumaqatigiissutini kiffartuussinermilu sullissisunit ingerlanneqartuni isumaqatigiissutit malinneqarnersut malinnaaffigineqartarpoq, Attaveqatigiinnermut Naalakkersuisoq oqarpoq.

Naalakkersuisut Inatsisartut Aningaasaqarnermut Akileraartarnermullu Ataatsimiititaliaannit akuerineqarlutik pisariaqartitsisoqartillugu saniatigut sullinnernik pisisinnaapput.

Maliina Ittuk kinguaattoortoq

Disko Linep umiarsuaa nutaaq Maliina Ittuk Kujataani sumiiffinni angalassanersoq Anders Olsenip ilanngullugu paaserusuppaa.

Disko Linep paasissutissiinera naapertorlugu Maliina Ittuk teknikkikkut ajornartorsiuteqarpoq, taamaattumillu massakkut Danmarkimi Frederikshavnimiilluni, umiarsuarlu aggustip aallaqqaataata missaani aatsaat Kujataani ilaasunik angallassilernissaa naatsorsuutigineqarpoq. Maliina Ittuk Qaqortup, Narsap Narsarsuullu akornanni ilaasunik angallassisassasoq eqqarsaatigineqarpoq. Nanortalimmut angalasussat ikippallaartut ukiut siuliini misilittakkat takutippaat, taamaattumillu Maliina Ittuup aalajangersimasumik Nanortaliliartarnissaa massakkut pilersaarutaanngitsoq, Aqqaluaq B. Egede paasissutissiivoq.

Taamaakkaluartoq anori, sila imaluunniit sikut peqqutaallutik Disko Linep angallataa Targa Nanortalimmut ingerlasinnaanngippat Maliina Ittuk sukkulluunniit Nanortalimmut angallassinissaanut piareersimajuassasoq Disko Line paasissutissiivoq. Taamatuttaaq Narsarmijini Aappilattumilu talittarfiit mikivallaarmata Maliina Ittuk nunaqarfinnut taakkununnga angalasassanngilaq.