Kiisami: Umiarsuaq imaani kabelilerisussaq Sisimiunut allarpoq
Umiarsuaq imaatigut kabelimik iluarsaasartoq, Horizon Enabler, ullumi arfininngornermi Nuummut Sisimiut tungaanut ingerlaarluni iluarsaassiartorluni aallarpoq.
Sisimiunit avannamut Kullorsuaq tikillugu internetimik atuisunut nutaarsiassatsialaqarpoq. Tassmai umiarsuaq imaatigut kabelimik iluarsaasartoq arfininngornermi ullaakkut Nuummit aallarpoq, Sisimiut kujataani kabeli kittorarsimasoq suliariartorlugu.
Horizon Enabler pingasunngormat marsip arfernganni kabelimut kingoraartissaq aallugu Nuummut tikippoq, tassa Sisimiut kujataatungaani kabelimut taarsiussassaq, Tele-Post tusagassiuutinut nalunaarummi ilisimatitsivoq.
Sapaatip-akunnerata naanerani apuutissasoq
- Naatsorsuutigineqarpoq umiarsuup sapaatip-akunnerata naanerani apuutissasoq, tamatuma kingorna iluarsaassineq aallartinneqassalluni. Sikoqarnera apeqqutaassaaq kabelip imaatigoortup qanoq pilertortigisumik iluarsaanneqarnissaanut, kisianni neriuutigaarput piffissaq pilersaarutigisarput malikkumaarlutigu, pisortaaneq Kristian Reinert Davidsen, tusagassiuutinut nalunaarut naapertorlugu taama oqarpoq.
Sila ajunngippat aammalu sikoqarpallaanngippat naatsorsuutigineqarpoq Sisimiut kujataatungaani iluarsaassineq marsip qeqqata missaani naammassineqassasoq.
Kujammut ingerlaqqissasoq
Sisimiut kujataani iluarsaassineq naammassineqariarpat taava Horizon Enabler Kujataanut ingerlaqqissaaq, tamaani iluarsaassineq tulliuttoq aallartinneqassalluni. Imaatigut kabelimik iluarsaassinerup ineriartornera telep nittartagaani malinnaaffigineqarsinnaavoq.