UIVERNEQ.
Umiarsuit tulattarfianni nuummiittumi sapaammi seqinnersumi pissutsit taama
naatsumik taaneqarsinnaapput.
UIVERNEQ.
Umiarsuit tulattarfianni nuummiittumi sapaammi seqinnersumi pissutsit taama
naatsumik taaneqarsinnaapput.
Umiarsualiviup illuatungaani: Nuuk Transportip kivitsissutaa, truckit inuttallu
kilisaat raajarniut Canadameersoq »Nain Banker« usingiarpaat, biili orsussanik
assartuut biililu nioqqutissanik assartuut orsussamik usissanillu
pajuleruttortut.
Umiarsualivitoqaq nutarsarneqassasoq
Nuuk
Sikuki Harbourip Namminersorlutik Oqartussanit pigineqartup Qeqertaq Avallermi umiarsualivimmik
allisiinissaat Kommuneqarfik Sermersuumit soqutigineqarluni
malinnaavigineqarpoq, tassami kilisaatit tulattartut nuutinneqarnerat
umiarsualivimmut annertuumik kinguneqassaaq.
Lastbiilerpassuit aalisakkanik raajanillu kilisaatineersunik illoqarfikkoorlutik
containereqarfimmi RAL-ip umiarsuaanut Atlantikukkut ikaartaatinut ullumikkut
assartuisarput, tamannalu Nuummi aqqusinikkut angallattoqangaatsiareersumi
qaavatigut ilasaataavoq.
Kommunimut pilersaarut 2032-moortoq naapertorlugu Sermersooq umiarsualivimmi,
inissiaqarluni, neriniartarfeqarluni, akunnittarfeqarluni
mingutsitsinngitsunillu inuussutissarsiortoqarluni umiatsilivinngornissaminut inerisarneqarsinnaasumik,
pilersaaruteqarpoq.
Taamatuttaaq sumiiffik tulattarfimmi inuussutissarsiutilinnut
atorneqarsinnaassaaq. Taamaammat kommuni sumiiffik pillugu aalajangersimasumik
pilersaaruteqanngilaq, Qeqertaq Avallermilu tulattarfiit nutarsarneqarneri
ilutigalugit inuussutissarsiortut qanimut suleqatiginerisigut suliarineqassasoq
naatsorsuuteqarpoq.
Sumiiffik umiarsualivimmiittoq siunissami umiatsialivippalaarnerulissasoq Kommuneqarfik
Sermersuumit neriuutigineqarpoq, taamaassappalli maanna atuisut, matumani
umiatsiaararsortut aamma, ullutsinnut naleqquttunik allami
tulattarfeqalernissaat imaluunniit aallussat illoqarfiup sumiiffimmi
inerisaaneranut ilaatinneqarsinnaanissaat naatsorsuutigineqassaaq.
Kommuneqarfik Sermersooq najukkami suliffeqarfiit 70-it peqatigalugit kattuffimmi
Nuuk Maritime Networkimi ilaasortaavoq.
Umiarsualiviup illuatungaani: Umiarsuarsuup takornariartaatip »Jewel of the
Seas« ilaasuni 2.501-iusut niuleruttorpai, arlallillu kilisaat usingiartoq saneqqutilaaginnarlugu
Nuuk Water Taxip umiatsiaanut sungaaqisunut ikiartorput.
Qeqqiinnarsuani: Nunatta iluani angalasut Maniitsoq Tour Boatip angallataanut »Bolatta«-mut ilaallutik
avannamukalersut Nuup Bussiisa Greenland Escapellu bussii takornarianik
ulikkaarlutik uteqattaarput.
Nangiarnaqaaq, sapaammili tassani takornarissat qujanartumik raajanik immami
uutanik qerisunik tonsip affaanik oqimaassusilinnik nakkarfigitinngillat…
Nuummi umiarsualivik Kalaallit Nunaanni umiarsualivinni ulapinnerpaavoq.
Kilisaatit avataasiutit 111-it – imaluunniit ullut pingasut ingerlaneranni
kilisaat ataaseq - siorna tulapput.
Umiarsuit takornariartaatit 58-it – imaluunniit ullut marluk ingerlaneranni
umiarsuaq ataaseq - ukioq manna juunip 19-ianiit septembarip 30-anut
tulattussaapput.
Umiarsualivimmili ulappunneq 2027-imi oqilissaaq.
Kilisaatiniit umiarsuarnut
Atlantikukkut ikaartartunut Namminersorlutik Oqartussat umiarsualivimmi ingerlatseqatigiiffiat Nuuk Sikuki
Harbour A/S Qeqertaq Avallermi, ingerlatseqatigiiffiup containereqarfiata
saniani umiarsuaatileqatigiiffimmut Royal Arctic Linemut attartortinneqartumi,
kilisaatinut tulattarfiliussaaq.
Umiarsualiviup allineqarnissaa Nuummi aallussinerup qaffakkiartuinnarneratigut
aalisakkanik raajanillu tulaassinermi assartueqqinnermilu isumannaannerusumik
suliarinninnissamik pisariaqartitsilernerup kinguneraa.
Kilisaatinut tulattarfissaq siullertut kilisaatinut avataasiutinut
tulattarfiussaaq, Kalaallit Nunaatali eqqagalerinermut ingerlatseqatigiiffia Esani A/S, illersornissaqarfik
oqartussallu allat kiisalu ilaannikkut umiarsuit misissuiartortut
umiarsualivittaami tulassinnaassapput.
Kilisaatinut tulattarfissaq 200 meterisut takissuseqassaaq kingusinnerusukkulli
300 meterinut tallineqarnissaa periarfissaassaaq.
Tulattarfik 14.400 kvadratmeteriussaaq, Qeqertaq Avallermilu Royal Arctic Linep
saniani inissisimanissaa kilisaammiit umiarsuarnut Atlantikukkut ikaartartunut
sukkasuumik usingiaallunilu usilersorsinnaanissaq soorunami iluaqutaassaaq.
Taamatuttaaq umiarsualivissap sanaartorfigineqarnissaanut piareersaaneq inuussutissarsiortunut
tulattarfimmut qanittumi inissisimanissaminnik pisariaqartitsisunut,
assersuutigalugu aalisakkerinermik suliaqartunut, quersuarnut, uninngasuusivissuarnut
aalisakkerisunillu suleqateqartunut inissaqalersitsissaaq.
Nuuk Sikuki Harbour A/S 2025-imi januaarimiit 2026-imi decembarimut
sanaartortitsissalluni pilersaaruteqarpoq, kingorna kilisaatinut tulattarfik
2027-mi ammassaaq. Kilisaatinut tulattarfissap akia ingerlatseqatigiiffiup ilisimatitsissutigerusunngilaa,
qaammatinili tulliuttuni sanaartortitsisussamik isumaqatigiissuteqarluni
atsioqateqarnissani naatsorsuutigaa.
