Kinamiup milliardærip Island pisiariniarpaa
Kinamiup milliardærip Reykjavikimi Islandillu avannaani aningaasaliissuteqarnissaminut tunngavigai akunnittarfiit nuimasoorsuit Islandimilu atasinaasumik takornariaqarneq. Tamanna nunami ernumanartoqartinneqarpoq
"Islandip nutaaliaasup avannaani nunami qatsissumi naasorissaasup illoqarpoq taaguutilimmik Grimsstadir á Fjöllum".
Nettimi tuniniaanermik suliniut taamatut aallartippoq, tamannalu pissutigalugu Kinamiup pisoorsuup aningaasaliissuteqartartorllu Huang Nubop qeqertami innermik anitsisartunik qaqqalimmi nuna inuilaaq soqutigilerpaa.
Aamma pissutaasinnaavoq nalunaarutigineqarmat nunaatillip nunaataata 65,9 procentia tuniniarneqartoq, aningaasaliisunut sanaartortitsisunullu nunanit allaneersunut piffissami toqqarneqarluarsimasumi. Huang-ip Islandip nunanut allanut ministeria Össur Skarphedinsson ataatsimeeqatigisimavaa pilersaarutinillu paasissutissillugu.
Huang Nubop ministeri oqaluttuuppaa Kinami aningaasaliissuteqarnermut ingerlatsivini Zhongkun Group Islandimi atasinnaasumik takornariaqarnermut aningaasaliissuteqarniartoq, Islandimilu takornariaqarnerup ineriartortinnerani peqataaniartoq nunami oqartussaasut inuillu suleqatigalugit.
Zhongkun Group akunnittarfinnik nuimasuunik marlunnik sananiarpoq, Reykjavikimi akunnittarfik ataatsimeersuartarfik nunanit tamanaalit atorneqarsinnaasoq 300-nik inilik, Grimsstadir á Fjöllum-imilu akunnittarfik 120-nik inilik. Tamanna isumalluarnarpasippoq nunami aningaasaqarniarnikkut ajornartorsiornermik suli sorsuutiginnittumi.
Suliniut Össur Skarphedinssonimit tigullarneqarpoq, taassuma kissaatigimmagu nunat allamiut Islandimi aningaasaliissuteqarnissaat takornariaqarnerullu nukittorsarneqarnissaa, pingaartumik nunaannarmi. Naalakkersuisuni ministereqataa, nunap iluani pissutsinut ministeri Ögmundur Jónasson tunuarsimaarneruvoq.
- Pingaaruteqarpoq isiginiassallugu pisineq intasisitigut tunngavissaqanngitsoq. Soorunamili inatsimmit immikkut akuersissummik qinnuteqartoqarsinnaavoq, qinnuteqaammilli taamaattumik tigusaqarsimanngilanga. Tigusaqaruma misissoqqissaassavara, Jónasson islandip radioata qupperneranut nittartakkamut ruv.is-imut oqarpoq.
Taassuma erseqqissarpaa pinngortitap illersorneqarnissaanut pinngortitallu pisuussutaanik atuinissamut sinaakkutassat Islandimi oqallisigineqaleruttortut. Tamanna nunat allamiut Islandimi nunamik pisisinnaanerannut attuumassuteqarluinnarpoq. Zhongkun-ip Grimsstadir-ip 75 procentia pisiarigallarsimavaa.
- Maanna pissutsit imaapput, nunap allamiup aningaasaatilissuup Islandip nunataa 300 kvadratkilometerimik annertussusilik pisiortuleruttoraa. Tamanna oqaluuserisariaqarparput imaasiallaannaq akuerinagu. Akuersaarsinnaassanerparput nunap tamarmi taamatut tunineqarnissaa, Jónasson aperivoq.
Inuussutissarsiornermut takornariaqarnermullu ministerip Katrin Júliusdottirip kinamiup pilersaarutai ernumanartoqartippallaanngilai. Taassuma ruv.is malillugu erseqqissarpaa maanna naalakkersuisuusut pinngortitami pisuussutit atorneqarnissaannut politikki ilusilersuleruttorpaat.
Huang Nubo-p Islandimik soqutiginninnera pilersimavoq ukiut 30-t matuma siornatigut Beijingimi universitetimi ilinniartuulluni tuluujussuarmik islandimiut savat meqquinik sanaamik, ikinngutiminit islandimiunit pisimasaminik, oqorsaateqarallarami.
Zhongkun Group, Grimsstadior á Fjöllum-imutd islandimiut koruuniinik 1 milliardinik (45 millioner koruunit missaannik) akileerusuttoq, 1995-imi Huangimit pilersinneqarpoq. Aningaasaliissuteqarnermik selskabi aningaasaliissuteqartarpoq USA-mi, Japanimi nunanilu allani illuutinut takornariaqarnermullu.