Kinap soqutiginninnerata ingasaannissaa mianersoqqussutigaa
Issittup Kinamut qanoq pingaaruteqartiginera ingasaatissanngilarput, seniorforskeri oqarpoq
Kinamiut Issittumik Nunatsinnillu soqutiginninnera ulluni kingullerni nunatsinni, aammattaarli Danmarkimi, tusagassiorfinnit sammineqartorujussuusimavoq.
Sianigissavarpulli isumaqassalluta Kalaallit Nunaat Kinap pingaarnersaatileriataaraa:
- Issittoq soqutiginarpoq, ingasaatissanngilarpulli Issittup Kinamut qanoq pingaaruteqartiginera. Kina piffissamut sivisuumut isiginninniarpoq taamaattumillu tamaani aningaasaliillluni, seniorforskeri Jonas Parello-Plesner, isumaliutersortarfimmit European Council on Foreign Relations-imeersoq Kristeligt Dagbladimit apersorneqarluni ullumi oqarpoq.
Atuaruk "Kinamiut Nunatsinni milliardilinnik atuinissaminnut piareersimapput"
Soqutiginninnerli annertusiartorpoq, taanna oqarpoq:
- Kalaallit Nunaat Kinamut pingaaruteqarnerulissaaq, aatsitassarsiorneq aatsitassanillu qaqutigoortunik piiaaneq soqutigineqarmata, taanna oqarpoq.
Tamatumali saniatigut Jonas Parello-Plesner, 2008-mi Danmarkip Kinallu akornanni pilersaarusiornermut peqatigiilernerannik suliarinnittut ilaat, isumaqarpoq Issittumi imaani killeqarfitsigut aaqqiagiinnginnernut soqutiginnittoq, tassa Kina Det Sydkinesiske Hav-imi tamatumunnga assingusumik misigisaqarsimammat.
Tassami issittumi killeqarfiliinerit nunani tamalaani killeqarfiliinermut periutsinut sunniisinnaavoq, taamalu aamma Kinamut.