KNAPK GA-lu isumasioqatigiipput
Kattuffiit KNAPK GA-llu aalisarnermi nutarterinissanik arlalinnik suleqatigiinnialerput.
Aalisartut piniartullu kattuffiat KNAPK sulisitsisullu peqatigiiffiat GA, kilisaataatillit kattuffiat, ullumikkut aalisarnermi pissutsit atuuttut oqaloqatigiissutigalugit februaarip 9-anni isumasioqatigiipput. Kattuffiit taakkua marluk isumaqatigiinniarnerni illuatungeriittuupput.
Kattuffiit isumaqatigiissutigaat aalisarnermik kattuffiit ullumikkut pingasunut, KNAPK-mut, GA-mut peqatigiiffittaamullu AP-mut, avissaartorneqarsimanerata allanngortinneqarnissaa pisariaqartoq.
Aalisariutit inuttassanik ajornartorsiuteqarput tamannalu kattuffiit marluullutik iliuuseqarfiginiarpaat, isumaqarlutillu aalisartunik inuttanillu ilinniagaqartditsineq ullumikkut piumasaqaatit sakkortuut malillugit aaqqissuunneqartariaqartut, KNAPK-p siulittaasua Leif Fontaine nalunaarummini allappoq.
Neqinik aalisakkanillu nunatsinni tuniniagassanik tunisassiornerup annertusarneqarnissaanik naalakkersuisut anguniagaat kattuffiit taperserpaat.
Kiisalu aalisartunut piniartunullu utoqqalinersianik apeqqut oqaluuserineqarpoq.
– Tamanna apeqqut qangali suliariniarusussimavarput. Taamaattumik maanna apeqqut tamanna peqqissaartumik misissulerparput, Leif Fontaine oqarpoq.
Kattuffiit taakkua marluk aappaagu isumasioqatigeeqqissamaarput.