KNAPK-mi siunnersuisoqatigiit: Sakkortunerusumik iliuuseqarneq atulertariaqarpoq
Nuummi novembarip ulluisa aallaqqaataani saarullinniat akerliussutsimik takutitsinertik pillugu tusaaneqannginnertik naammaginngilaat. Maanna sakkortunerusumik iliuuseqarneq atulertariaqarpoq, KNAPK-p siulersuisuuneri taama siunnersuuteqarput.
KNAPK-p ataaniittut Aalisakkat Allat Pillugit Siunnersuisoqatigiit "inuussutissarsiornikkut inuiaqatigiinnilu aningaasarsiornermut sammitinneqartunik iliuuseqarnissaannik" siulersuisuunerit kaammattorpaat.
Saarullinnik tunisinermi akigititat naammaginninnginneq pillugu aalisartut kamapput, tamannalu pillugu sakkortunerusumik iliuuseqarnissamik kaammattuititsivoq, novembarip aallaqqaataani akerliussutsimik takutitsinerup naammassimannginnera pissutigalugu.
- Maannakkut sakkortunerusumik iliuuseqarneq sunniiniarnerlu atulertariaqarput, Siunnersuisoqatigiit siulittaasuat, Jens M. Lyberth, tusagassiuutinut nalunaarummi aalajangersumik oqarpoq.
Ajortut amerlanerit
Tunisinermi akigititat saniatigut Jens M. Ltberthip uparuarpaa, oktobarimi tunisinermi akigititat apparneqarmatali, assartuinermut akinik qaffaanissamik Royal Arctic Linep ilimasaaruteqarnera, tamannalu "atuisartunik tamanik eqquisussaavoq, pingaartumik pissakinnerit sakkortunerpaamik eqqugaasussaapput. Sinerissap qanittuani aalisartut sakkortuumik eqqugaasussaapput".
Eqqaaneqarportaaq ikummatissap akianut tapimik eqqussisoqarnissaa pillugu Naalakkersuisunut kissaateqarsimallutik, kinguneqanngitsumilli.
Inatsisartut Naalakkersuisullu pissutsit ilungersunarnerannik paasinnikkusunnginnerat, Aalisakkat Allat Pillugit Siunnersuisoqatigiit KNAPK assigalugu erloqinartippaat, tamanna tusagassiuutinut nalunaarummi erserpoq.
"Ajornartoorluinnarneq"
- Sinerissap qanittuami aalisartut oqilisaassiffiginiarlugit aningaasaliisoqanngilaq, naak saarullinniarneq 2022-p aasaaneraniit ajornartoorluinnarnermik eqqugaaqqagaluartoq, Jens M. Lyberth oqarpoq, uumatitsiviillu assortuussutaaqisut pillugit aamma isornartorsiuilluni.
Aalisakkat Allat Pillugit Siunnersuisoqatigiit suliaminnik siuarsaanissaminnut suut sakkut atorniarneraat, Sermitsiaq.AG-p itisiliititsiniarnera iluatsinngilaq.
Politikkikkut aaqqissuussaaneq pillugu siunnersuisoqatigiit nersualaarutituaat nuannaarutigineqartorlu tassaavoq, "Aalisarnermut Piniarnermullu Naalakkersuisup Royal Greenland A/S piumaffigimmagu, saarulliit tunineqarneranni akit pillugit saqitsaannermi naapeqatigiissitsiniaasartumik toqqaassasoq".