KNAPK: Nutaamik eqqarsarta

- Kalaallit Nunaanni sinerissamut qanittumi aalisartut piniartullu inuiaqatigiinnut pingaaruteqarluinnartumik inissisimasuupput, assortorneqarsinnaanngitsumillu sineriassuatsinni kitaata avannaarpiarsuaniit kujataani nunap isua uiarlugu aamma kangiani aasami ukiumilu illoqarfinni nunaqarfinnilu inoqutigiit tamarluinnaasa nerisassaannik ukiorpassuanngortuni pilersugariuarpaat.

KNAPK-siulittaasua, Leif Fontaine, ukiortaami oqalugiaammini aallartippoq.

- Taassuma saniatigut nunatta inuussutissarsiornikkut aningaasarsiorneranut pingaaruteqarnerpaamik aalisartut ukiorpassuarni inissisimapput aalisakkanik qalerualinnillu nunamut tulaasuinermikkut nunap inuinik suliffissaqartitsillutillu inuiaqatigiit ingerlaannarnissaannut qulakkeerisuugamik.

- Kalaallit Nunaanni inuussutissarsiutitta pingaarnersaat, tassalu aalisarneq piniarnerlu inuiaat ullut tamarluinnaasa inuussutissaminnik pisariaqartitaminnik aallerfigisarpaat.
Taamaattorli sineriassuatsinni pisuussutitta atorluarneqarnissaannut suli pitsaanerungaartumik iliuuseqarnissatsinnik pisariaqartitsivugut. Ukiorpassuanngortuni aalisakkatigut tunitsiveqarnikkut tunisassiorfeqarnikkullu piorsaaneq killeqarsimavoq, ajoraluartumik piniakkat imarmiuppata nunaminngaaneersuuppataluunniit, aalisakkatuulli tunitsiveqartinnissaannut aammalu tunisassiarineqarnissaannut periarfissaannik piorsaasimanngilagut. Tassami kalaaliminernik tuniniaaviit eqqaassanngikkaanni allanik periarfissiisoqarnikuunngilaq, Leif Fontaine tikkuaavoq.

Nutaamik eqqarsarta - periarfissarpassuaqarpoq.

Siulittaasoq naapertorlugu Pingaaruteqarpoq maannakkut siunissaq eqqarsaatigalugu ”Kalaaliaqqat” kisiisa isumalluutigiunnaarlugit nutaamik eqqarsarluni marloqiusamik tunitsivinnik, aalisakkanut neqinullu tunisassiorfittalinnik pilersitsiortornissaq pisariaqalerpoq.

- Sineriassuatsinni fabrikkit matoorarneqartarput, tassani Royal Greenland-ip inuiaqatigiit sinnerlugit aqutaat, aalisakkat tunitsivimmut tulaanneqartartut avammut niuerutigineqarnissaannut annikippallaalersullu matuinnartarpaat. Tamanna allanngorluinnartariaqalerpoq Kalaallinik nunaqavissunit aalisartunik piniartunillu tiguneqartariaqalerput pisiarineqarlutilluunniit. Aqutsiveqarsinnaapput ataatsimoorussaminnik aqutsisulerlugu, ikioqatigiinnikkut sumi sunillu amigaateqarnermik malinnaasussanik.

- Ilisimaariiluinnarparput Nunarput aalisarnikkut periarfissarpassuaqaraluartoq, ukiorpassuilli imaaneersunik avammut niivernermi ingerlaasitoqaq sanngiitsumik qajannartumillu inissisimajuartoq pissutigalugu inuiaqatigiit Kalaallit pissasiaat killeqarpaallaaqaat. Niiveriaatsit nutaaliat periarfissaapput allanguinikkut ammaanneqarsinnaasut, KNAPK-siulittaasua oqarpoq.

Nammineq pilersorneq – avataanut tuniniaanerinnaanngitsoq
- Piffiit sumiiffiit assigiinngitsunik tamarmik pikkoriffeqartarput, taamaammat tamakkua atorluarniarlugit illoqarfigisaminni nunaqarfigisaminniluunniit nerisassatigut pisariaqartitaminnik pilersuilluarsinnanngussapput. Tassa alisagaappata, nunami uumasuuppata, imaani timmiaappata miluumasuuppataluunniit. Assersuutigineqarsinnaavoq nammineq pilersuisinnaanitsinnut periarfissat, tassalu neriniartarfinnut, utoqqaat illuinut, meeqqerivinnut, napparsimavinnut, pisiniarfinni nioqqutissatut pilersuinerit assigiinngitsut ilaalu ilanngullugit.

- Imaanngilarmi nunanut allanut niuernissaq kisimi eqqarsaataassasoq, aamma nammineq immitsinnut annertunerusumik ikiorsersinnaavugut, namminerisatsinnik tunitsiveqalernitsigut tunisassiornitsigullu, tassa immikkoortillugit aalisakkat neqillu suliarineqartunngorlugit. Tunitsivik tunisassiorfik tuniniaavik, tassa suna qanoq sumut kimullu tunisassiornissap nammineq aalajangiinnartussaavaa aalisakkat qanoq tunisassiarissanerlugit, aammalu neqit suugaluarpataluunniit qanoq tunisassiarissallugit.

- Tunisassiarineqarsinnaasut assigiinngitsorpassuit tamaasa taagorniassagaluarutsigit quppernerpassuit atorneqarsinnaagaluarput. Eqqarsariallaqqinnerulli tamanna nammineq aqussinnaavaa, Leif Fontaine isumaqarpoq.

- Kalaallit Nunatta nammineq inuussutissatigut annertunerusumik pilersorsinnaanera pitsaasumik aallassagaluarpoq. Taamatullu aamma nunanit allaniit inuussutissatigut tikisitat annertuumik millisinneqassagaluarlutik. Minnerunngitsumillu aningaasat nunatsinni kaaviiaartut annertuumik malunnaatilimmillu qaffassagaluarput, avammullu akiliutigalugit nassiussukkat assigisaanik milleriaateqassagaluarlutik Nunatta aningaasaqarniarneranut annertuumik malunnaatilimmik, KNAPK-siulittaasua tikkuaavoq, taassuma aamma sinerissap qanittuani raajarniarnermi allanngortitsisoqarnissaa ujartorpaa.