KNAPK: Pisassiineq mamaalluinnarpoq
Aalisartut piniartullu kattuffianni KNAPK-mi ilaasortat arlallit angallatinik aalisariaannarnik peqaraluartut saarullittassanik qinnuteqaramik itigartinneqarsimapput. Tamannalu mamaalluinnartut KNAPK-mi siulittaasoq oqarpoq.
KNAPKp piumasariuarsimavaa saarullittassiinermi kalaallit aalisartut salliutinneqassasut. Aamma Fiskerirådi aqqutigalugu piumasarisimavaat avataani saarullittasiisoqassappat selskabit aalisariaannarnik angallataatillit pisassinneqassasut
– Angallataatillit ilaat ima pisassakitsigaat allaat allanut pisassanik pisiniartariaqartarlutik aalisarnertik ingerlatiinnarniarlugu. Ilaasortavut arlallit taamatut inissisimasut saarullittassinneqarnissamik qinnuteqarsimagaluarput itigartinneqarlutilli. Taamaattumik paasisinnaanngilarput selskabi angallataateqanngitsoq saarullittassinneqarmat, taama Peter Olsen Sermitsiaq.gl-mut oqarpoq.
KNAPKp siunnersuutigaa angallataatillit arlallit kattuteriarlutik 40 meteri sinnerlugu takissusilinnik angallataatitaarlutik saarullinnialersinnaagaluartut.
Inuit Ataqatigiit inatsisartuni ilaasortaatitaat marlunngornermi ualikkut nalunaarput aalisarnermut naalakkersuisoq Finn Karlsen tatigiunnarlugu. IA isumaqarpoq naalakkersuisut aalisarnermut inatsit unioqqutikkaat.