KNAPK: Takornariartaatit nunatta imartaani sumi angalasinnaatitaanersut aalisartut piniartullu pimasaraat
KNAPK-p Qaanaami Ittoqqortoormiiniillu immikkoortortaqarfiisa killiliisoqarnissaa kissaatigaat, umiarsuit sumiiffinni eqqissisimatitani ingerlaartarmata, tassami qilalukkat piaqqiorfigalugillu neriniarfiit sumiiffiit ilaat inissisimammata. Umiarsuit piniarnermik inuussutissarsiortut soqutiginagit ingerlaarput, aalisartut piniartullu kattuffiannit oqaatigineqarpoq.
- Kommunit eqqorneqartut, aalisartut piniartullu aalisarfiisa piniarfiisalu aallunnissaannut illersorneqarnissaannullu isumaginnittussaagaluit umiarsuit ingerlaarnerannik killiliinngillat. Tamannami kommunimi ileqqoreqqusaliornikkut aaqqiivigineqarsinnaagaluarmat, KNAPK-p siulittaasua Nikkulaat Jeremiassen tikkuaavoq nangillunilu:
- Namminersorlutik Oqartussat aamma umiarsuit nuannaariutit angallatillu tingerlaataannarsortut sumut ingerlaarsinnaanerat killiliiffigisinnaagaluarpaat.
Aalisarneq piniarnerlu inuussutissarsiutitut takornariaqarnermut sanilliullugu pingaartinneqarnerusariaqarpoq
Umiarsuit nuannaariutit aammalu angallatit tingerlaataannallit nunatta imartaani sumut ingerlaarsinnaatitaassanersut pillugit aalajangersaasoqarnissaa KNAPK-mit kissaatigineqarpoq sunniuteqaqataaffigineqarusullunilu:
- Pingaaruteqarpoq innuttaasut kattuffiillu susassaqartut avoqqaarliuteqarsinnaanerat, taamaasilluni inuussutissarsiortut tusaaneqarlutillu akulerutsinneqarsinnaaniassammata, kisiannili aamma pingaaruteqarpoq aalajangiinernut akisussaaqataalernissaq, Nikkulaat Jeremiassen oqarpoq.
Umiarsuit takornariartaatit tingerlaasersortullu pillugit KNAPK makkuninnga kissaateqarlunilu piumasaqaateqarpoq:
- Kangerluit susassaqanngitsut umiartorfigissanngikkaat, ingammik nunaeqqissisimatitaq eqqarsaatigalugu.
- Qilalukkat qernertat aamma timmissat neriniartarfii piaqqiortarfiisalu tikinneqartannginnissaat (ass. sumiiffiit RAMSAR-imik taagorneqartut).
- Sumiiffinni piniarfiusut ataqqineqarnissaat aammalu uninngaartarneri ungasissusilerlugit (qaqugukkut sumilu).
- Najukkami piniartunut iluaqutaasussamik takornarianut akitsuummik eqqussineq (silaannaap allanngoriartorneranut atatillugu akitsuut).
- Nunatsinni tamarmi tuttut umimmaallu nuna najugaat mianerilluinnarneqassasoq.
- Nuannaariutit nunatsinneersunik ilisimasortaqartinneqassasut.
Apeqquterpassuit akissutisineqarusuttut
Umiarsuit takornariartaatit nunatta imartaani angalasarnerannut tunngassuteqartunik allanik aamma KNAPK apeqquterpassuaqarpoq:
- KNAPK-miit aamma sukumiinerusumik misissuiffigitikkusunneqarpoq eqqagassat (anartarfiit, errorsinermi akuutissat, saliinermi akuutissat, akuutissat assigisaallu) qanoq isumagineqartarnersut, umiarsuit makittarissaataannut iluaqutaasoq imeq sumut kuineqartarnersoq, umiarsuarniit nipimik mingutsitsisoqarnera qanoq annertutiginersoq, CO2 aniatinneqartoq qanoq annertutiginersoq, atortorissaarutitigut, peqqinnissaqarfikkut, ujaasisarnikkut annaassiniartarnikkullu qanoq atuisoqartiginersoq.
Naggataatigullu KNAPK-mit Namminersorlutik Oqartussat kaammattorneqarput sunngiffimmi takornarianillu angallassisut umiarsuit nunatta imartaani ingerlaarsinnaanerat pillugu tamakkiisumik oqartussaaffeqalernissaq piginnaasaqarnissarlu qulakkeerniarlugit sulisoqassasoq.