KNI A/S ilungersorpoq: 73 millionit koruuninik amigartooruteqartoq

KNI A/S 2024/2025-mut ukiumoortumik naatsorsuutini akileraarutit suli ilanngaatiginagit 73,3 mio. kr.-nik amigartooruteqarpoq. Ukiumut angusat ukiup siulianut sanilliullugit 247 mio. kr.-nik ikinnerupput. Allatut oqaatigalugu: Ingerlatseqatigiiffiup ukiumut angusaasa ukiup siulianut sanilliullugit koruunit milliuunip kuartiata missaanik ikinnerupput.

Tamanna ingerlatsiviup ukiumoortumik nalunaarusiaani, pingasunngornermi ualikkut ataatsimeersuarnermi saqqummiunneqartumi, nalunaarutigineqarpoq.

Pilersuisoq 92 million koruuninik amigartooruteqarpoq, Polaroililu 15 million koruuninik sinneqartooruteqarsimavoq, tassa ukiup siulianut sanilliullugu 125 million koruuninik sinneqartoornikinnerulluni.

- Nioqquteqarnermik ingerlatsivimmi ukiumi angusat naammaginanngitsutut nalilerneqarput ikummatissaqarnermulli ingerlatsivimmi akitsornaveersaartitsisoqarnikuugaluartoq sinneqartoorutimininnguit naammagisimaarneqarlutik, KNI-ip ukiumoortumik nalunaarusiaani aqutsisut nassuiaatiminni allapput.

Aqutsisut nassuiaapput angusat ajornerulernerat ingerlatseqatigiiffiup atugassarititaasa allanngorsimanerannik pissuteqartoq. Illoqarfinnut anginernut nuttarneq, poortuutissat pillugit nalunaarut nutaaq Kangerlussuullu atlantiku qulaallugu timmisartoqarfittut atorneqarunnaarnera ingerlatseqatigiiffimmut sunniuteqarnerlupput. Tamatuma saniatigut ikummatissat akitsoriartorput.

Sipaarniutit suliniutillu allat aallartinneqarput

Nunatsinni ulluinnarni nioqqutissat akitsoraluttuinnarput, tamannali isumaqanngilaq siornamut sanilliullugu akit qaffakkiartornerat Pilersuisup aningaasivianut iluaqutaangaatsiassasoq.

Pilersuisoq 92 mio. kr.-nik amigartooruteqarpoq, tassa ukiup siulianut sanilliullugu 122 mio. kr.-nik ajornerusumik angusaqarluni. Nioqquteqarnermik ingerlatsivimmi amigartooruterpassuit ukioq manna KNI-p isertitaasa ikilinerinik kiisalu siunissami aamma isertitsissutaasartussat ikinnerunissaannik kinguneqarpoq, taamatullu ikilisoqartillugu naatsorsuusiortarnermi malittarisassat naapertorlugit niuernermik ingerlatsinermi naliliutit nalikilliliivigineqarnissaannik malitseqartarpoq.

- Inuit nutsernerinik pissuteqartumik nunaqarfinni illoqarfinnilu isorliunerusuni pisisartuvut suli ikiliartuinnavipput. 2001-imiit inuit 10 %-it missaanniittut nuuttartut suli amerliartorput. Poortuutissat pillugit nalunaarutip nutaap kinguneraa KNI-p nunatsinni tamarmi immiaaqqqanik sodavandinillu isertitaqartarunnaarnera, angusat pitsaannginnerat nassuiarneqarpoq.

Nuummi mittarfissap nutaap atulernerata kingunerisaanik Kangerlussuarmi akitsuuteqanngitsumik pisiniartitsineq atorunnaarnera aamma pissutaaqataatinneqarpoq.

Suliffeqarfik, pingaartumik Pilersuisoq, siunissami pitsaanerusumik ingerlanissaa anguniarlugu KNI iliuusissanik arlalinnik aallartisaavoq:

- Ingerlatsiviup aqutsisui taamaattumik niuernermik ingerlatseriutsip misissorluarneqarnissaa aallartippaat ingerlatsivimmilu sipaarutissanik arlalinnik ingerlataqartoqarluni, ilaatigut piffissami qaninnerusumi ungasinnerusumilu isertitassanut pitsanngorsaataasussanik ingerlatanik ikilisaasoqarnikuulluni, nassuiaatigineqarpoq.

Pilersuisup 2024/25-mi kaaviiaartitai 246 mio. kr.-nik apparsimapput. Tamanna pingaarnermik peqquteqarpoq Nuuk Imermi poortuutissat pillugit nalunaarutip nutaap atuutilernerata kingorna tunisassiornerup unitsinneqarsimaneranit.

Akit appartinneqarnerisigut sinneqartoorutissat ikilisut

Nunarsuarmi ikummatissaq akisuneruleriartorpoq, Kalaallit Nunaanni ikummatissat akitsornerusimanngillat, akikilleriarsimallutilli Polaroilip akit qulakkeerniarlugit isumaqatigiissuteqarneratigut piginnittullu isumaqatiginerisigut.

Polaroil 15 mio. kr.-nik sinneqartooruteqarpoq, tassa ukiup siulianut sanilliullugu 125 mio. kr.-nik sinneqartoornikinnerulluni. Ukiup siulianut sanilliullugu isertitat ikinnerujussuannut pissutaavoq ikummatissat akiisigut qulakkeerissutit iluaqutaasut atorneqarunnaarnerat, taarsiullugulu ikummatissat piffissami 2022-2024-miit akisunerusumik pisiarineqartut atorneqarmata.

Aalajangerneqarsimavoq akinut iluanaarutaasut atuisunut aamma iluaqutaassasut, taamaalillunilu ikummatissat akitsoraluttuinnaraluartut nunatsinni akit malinnaatinneqarsimanngikkallarput.

KNI A/S-ip naatsorsuutigaa 2025-mi 50 million koruuninik sinneqartooruteqassasoq. Tamannali anguniarlugu suliniuteqartariaqarpoq sipaarniartoqarlunilu:

- Siunissami qaninnerusumi niuernermik ingerlatani naleqqussaasoqassaaq. Piffissalli akunnattup ingerlanerani siunissamilu ungasinnerusumi tamanna attanneqarsinnaanngilaq, taamaattumik illoqarfinni mikinerusuni nunaqarfinnilu siunissami qanoq aaqqiinissarput pillugu piginnittuvut suleqatigissavavut.