KNI: Avannaani nunaqarfiit ukiuunerani pilersorneqarnissaat qulakkeersimavarput
Ilulissani, Aasianni Qasigiannguanilu pisiniarfiit nillataartitsivii piffissami sivisulaartumi imaqarsimanngillat. Nioqqutissat maanna timmisartukkut assartorneqarsimalerput, taamalu nillataartitsiviit imaqaqqilerlutik ukiuuneranullu pissamaateqartoqaqqilerluni.
RAL sapaatip-akunneri marluk sinnerlugit kitaata sikoqarnera pissutigalugu Aasiannut, Qasigiannguanut Ilulissanullu assartuisinnaasimanngilaq. Assartuisinnaasimannginnera innuttaasut akornanni pakatsissutigineqarsimavoq, innuttaasut ilaasa yoghurtit laktosetaqanngitsut allalluunniit pisariaqartittaramikkit.
KNI-mit ilisimatitsissutigineqarpoq, nunaqarfiit pisiniarfiini Pilersuisuni nioqqutssat kingusinaarunneqarsimanerat malugineqarsimanngitsoq, ukiup taamaalinerani nioqqutissanik nutaanik pissarsineq ajoramik.
- Nunaqarfinnut ukiuunerani assartuisoqanngisaannarpoq, taamaakkaluartoq ukiuunerani pissamaatissaannik soorunami isumaginnissimavugut. Qqertarsuup Tunuata maannakkut sikoqarnerani nunaqarfimmiut allanngortoqarneranik malugisaqarsimanngillat, KNI-p pisiniarfiutaanni pisortaq Brian Weuge Chemnitz Sermitsiaq.AG-mut oqarpoq.
Brugsenimi Pisiffimmillu aalajangiunneqarsimavoq, nioqqutissanik Ilulissanut timmisartukkut tikisitsinissaq, assartuisoqanngikkaluartoq nioqqutissanik nutaanik pissaqarniassammata. Taassuma oqaluttuaraa, KNI paarnanik naatitanillu nutaanik kiisalu immunnit tunisassianik qallersuutissanillu inniminniisartoq, RAL-ip umiarsuaataa atorlugu Ilulissanut, Aasiannut Qasigiannguanullu kiisalu Qeqetarsuarmut assartorneqartartunik.
- Illoqarfinnut pineqartunut taakkununnga ukiuunerani pissamaatissanik aamma inniminniisimavugut, pisiniarfiit nioqqutissanik pisariaqartinneaqartunik amigaateqannginniassammata, KNI-p pisiniarfiutaanni pisortaq oqarpoq.
Mary Arctica sapaatip-akunneri marluk sinnerlugit Qeqertarsuut Tunuani kinguaattooqqasimavoq