KNI ilusilersuisarnermi nersornaammik nersornaaserneqartoq
Ilusilersuisimaneq kalaallit kinaassusaannik ersersitsisoq, Red Dot Awardip unammisitsinerani dommerinit tigulluarneqarsimavoq, taamalu KNI nersornaaserneqarluni.
Nersornaasiinissamut unammisitsinermi peqataasut 7.000-it nunanit 50-ineersut nassiussissimasut unammillertigalugit, KNI Pilersuisumik nittarsaassinerminik nersornaaserneqarneq, ingerlatseqatigiiffik Namminersorlutik Oqartussanit pigineqartoq tusagassiorfinnut nalunaaruteqarnermi ilisimatitsivoq.
Suliffeqarfissuit tusaamasat unamillerneqarsimapput. Nunani tamalaani suliffeqarfissuit nittarsaassisarnermut annertuunik aningaasaliisartut, soorlu Sony, Audi aamma Coca-Cola siusinnerusukkut nersornaaserneqartarsimapput.
Nunarsuarmi ilusilersuillaqqinnerpaat unammineqarsimasut
- Nersornaasiisarnermi aalajangiisartut nutaamik isikkulersuisimanitsinnik akissarsititsinerat tulluusimaarutissaraarput. Nunarsuatsinni isikkulersuisartut pikkorinnerpaat unammillertigisimavavut, taamaattumik nersornaasiinerup Nunatsinnut tunniunneqarnera assorsuaq ajasoornarpoq, KNI-mi pisortaaneq Peter Grønvold Samuelsen oqarpoq.
- Nuannaarutiginerpaavaralu kinaassutsitsinnik allat aamma nersorinnissinnaanerat. Taamatut isikkulersuinitsinni Pilersuisup suli kalaalerpaluttunngortinnerunissaa sumiiffiillu tunngavigalugit isikkulersuinissarput anguniarsimavarput. Taamaattumik pisiniarfitsinni allagartaliussuuttakkavut kulturitsinnut nunallu immikkoortuini sumiiffinnut naleqqussartarpavut taamaalillutillu pisiniarfitta assigiissaartumik isikkulersorneqarnerinik takutitsisarlutik.
Pilersuisoq er til stede i alle bygder
- Nunatsinni oqaluttuarisaanerput KNI-mi tulluusimaarutigaarput, taamaattumillu tamatta
ilisarnaatitut atortakkatta tunngaviginissaat uagutsinnut pissusissamisuuginnarpoq, soorlu
nuilaqutit nipinngasortaat erfalasorpullu tunngavigalutigit isikkulersuisimalluta - aammali sumiiffinni atorneqartartut isikkulersuutigisarpavut soorlu ulut, piniakkat, qamutit qimussillu. Tassami Pilersuisup pilersuisussaatitaanera tunngavigalugu Nunatsinni tamani ikkatta sumiiffinni atuuffeqartuassaagut - tamannalu isikkulersuisimanitsinni takuneqarsinnaavoq, Peter Grønvold Samuelsen naggasiivoq.