KNI kangiani avannaanilu immiaaqqat sodavandillu akiinik qaffaavoq
Pilersuisoq tallimanngornermi Qaanaami, Ittoqqortoormiini Tasiilamilu kiisalu taakku nunaqarfiini immiaaqqanut sodavandinullu nunatta sinneranisulli akinik assigiinnik atulersitsissaaq.
Assiliisoq: KNI
Imeruersaatit puuinik nalunaarutip nutaap atulersinneqarnerata kingorna immiaaqqat sodavandillu akiisa nalimmasarneqarnissaat KNI-p aalajangerpaa, taamaammallu Tasiilami, Ittoqqortoormiini Qaanaamilu kiisalu taakku nunaqarfittaanni immiaaqqat sodavandillu akiisa qaffannerannik atuisartut eqqorneqassapput.
Taamaalilluni akit KNI-p pisiniarfiisa sinnerinisulli ilissapput.
Pilersuisup pisinarfiinik ingerlatsisup KNI-p tusagassiuutinut nalunaarummi akit qaffannerat tallimanngornermi pissasoq nalunaarutigaa.
Nioqqutissat assigiit = akit assigiit
KNI nunatta kangiani Qaanaamilu ukiup nikinnera tikillugu qillertuusanik utertillugit passunneqarnissaannik piumasaqaatitaqanngitsunik nioqquteqartarsimanera akit qaffannerannut tunuliaqutaavoq, taamaammallu taakkununnga aningaasartuuteqartarsimanngilaq. KNI naapertorlugu akitsuusiisarneq nunatta kangia Qaanaarlu nunatta sinneranitulli akitsuuteqartitsiviunani aaqqissugaavoq.
Imeruersaatilli puuinut nalunaarutip nutaap atulernerata kingorna KNI-p pisiniarfiisa nioqqutissat assigiit manna nioqqutissaatigilerpai, taakkulu aallaavittut assigiimmik akeqarput.
Taamattaaq piffinni taaneqartuni pisinarfinnik ingerlatsinermi aningaasartuutit qaffasinnerunerat KNI-p innersuussutigaa:
- Sineriammi sikusartumi taama isorartutigisumi pilersuinermik suliaqarneq assartuinermut toqqorsivimmiititsinermullu qaffasissunik aningaasartuuteqartarnermik malitseqarpoq. Qaanaami pisiniarfimmik ingerlatsineq assersuutigalugu Atammimmi pisiniarfimmik ingerlatsinermit akisuneruvoq. Toqqorsivinnik ingerlatsinermut aningaasartuutit sikusartunilu ukiup annersaanut nioqqutissanik toqqortaateqartarnermut aningaasartuutit nunatta sinneranit qaffasinnerujussuupput, KNI pisiartunut tamanut akinik nalimmassaasoq allappoq.
