KNI-mi mamianartuliortoqarneranit torersaaneq akisooq
KNI-mi mamianartuliaq, ilaatigut toqqorsiviit naatsorsuutaannik ukiut arlallit ingerlaneranni peqquserluttoqarneranik kinguneqartoq, ukiuni marlunni kukkunersiuinermut 19 milliuunit koruuningajannik akeqarsimavoq.
KNI-p naatsorsuutaanik iluarsaassineq akisusimavoq.
Mamianartuliaq tusagassiorfinnit saqqummiunneqartinnaguli, KNI 2021/22-mi 11,7 mio. kr.-nik akiliisariaqarsimavoq, naatsorsuutinilu kingullerni 7,2 mio. kr.-nik akiliisariaqarsimalluni. Mamianartuliap qulaajarneqarnera sioqqullugu suliffeqarfik Namminersorlutik Oqartussanit pigineqartoq kukkunersiuinermut 1,3 mio. kr.-nik aningaasartuuteqarsimavoq.
- Naatsorsuutit allanngortinneqarsimasut iluarsineqarnissaannut suliallu allat qulaajarneqarnissaannut kukkunersiuisartut arlallit atorneqarput, aammattaarli misissueqqissaarnerit arlallit, soorlu nioqqutissat amerlassusaat, nalikilliinerit, suliffeqarfiup iluani niuernerit, akileraarutit ilanngaatigineqartartut, akitsuutit allarpassuillu pillugit qulajaanissat pisariaqarsimapput, KNI A/S-imi pisortaaneq Jeppe Jensen Sermitsiaq.AG-mut oqarpoq.
Siumut isigisinnaalersut
Taassuma erseqqissarpaa, maannakkut „torersaaneq naammassineqareersoq, taamaattumillu ingerlatseqatigiiffik siumut isiginiarsinnaalersoq, tammanalu pitsaasuusoq“.
Ilisimatitsissutigaali siunissami piffissallu ilaani kukkunersiuinermut immikkut ittumik aningaasartuuteqartuarallassallutik.
- Kukkunersiuinerit inatsisitigut pisussaaffeqarfillit aningaasartuuteqarfiunerupput, naatsorsuutini peqquserluttoqarsimasoq 2020/21-mi qulaarneqarmat, kukkunersiuisut nutaat sukumiinerusumik kukkunersiuisalissammata. Kukkunersiuisup siornatigut atorfeqartup 2020/21-mi 2021-mi marsip 31-ani toqqorsiviit nalingat nangaanartoqartissimavaa. Taamaattumik kukkunersiuisup nutaap nunami sumiiffinni amerlasuuni, aamma nunaqarfinni, toqqorsivinni nioqqutissat kisinneqarnerini najuunnissaminut atuinerusarpoq, qulakkeerniarlugu periutsit nakkutilliinerillu tamarmik malinneqartut, Jeppe Jensen nassuiaavoq.
Jeppe Jensenip naatsorsuutigaa piffissap ingerlanerani akiligassat ikiliartorumaartut, ingerlatseqatigiiffimmi ERP-systemimik nutaamik atulersitsilerpoq, taamaasilluni nakkutilliinerup tunngavianik nukittorsaassalluni.
Nakkutilliisarneq sukannernerulerpoq
- Kukkunersiuisunut aningaasartuutit tamarmiusut takussutissaapput sullissinernik allanik (siunnersuisartunik) pisisimanitsinnut, ilaatigut ERP-systemimik nutaamik suliaqarnermut atatillugu. Tassani PwC-mi siunnersortitut sulisut suleqatigalugit ingerlatsinitsinnik nakkutilliinitsinnillu misissuisimavugut, taakkualu siunissami suliffeqarfiup iluani nakkutilliinerup annertunerulernissaa minnerunngitsumillu suliat pitsaanerusumik ingerlanneqarnissaat qulakkeerumaarpaat, pisortaq oqarpoq.