KNI-mi qullersat tunniutiinnarput: Tatiginninneq pilerseqqinneqassaaq

KNI-mi naatsorsuutinik allanngortiterisoqarsimanersoq attuumassuteqanngitsumik misissuinerup qulaajassavaa, sulisuusimasullu marluk tamanna uppernarsarsinnaallugu isumaqarput, tamannalu Sermitsiami aviisimi saqqummersumi kingullermi atuartartutut allagaqarnermi saqqummiuppaat.

Aammattaaq siulersuisunut siulittaasoq Lars Borris Pedersen, partiimi siulittaasup Múte B. Egedep marlunngornermi Sermitsiaq.AG-mi piumasaqaataanut akuersivoq. Taassuma “KNI A/S-imi naatsorsuinermi pissutsit attuumassuteqanngitsumik misissoqqissaarneqarnissaat” piumasaqaatigaa.

Deloittep suliarinninnera
Ingerlatseqatigiiffimmut Namminersorlutik Oqartussanit pigineqartumut siulersuisunut siulittaasoq aallaqqaammut nammineq kukkunersiuisartuminnut, Deloittemut misissuititsivoq, tassani KNI-mi peqqumaasivimmi uninngasuutit nalinginik naatsorsuinermi 2010-mili ajornartorsiuteqartoqartarsimaneranik inerniliisumik.

Aamma atuaruk:Pasilliut: KNI-p naatsorsuutinik peqquserlunneq isertuunniarsarigaa

Kukkunersiuisoqarfiup ukiuni arlalinni naatsorsuutini kukkunermik takunnissimanngitsup misissuisuunissaa arlalinnit tupigutsaatigineqarpoq. Kisianni tamanna aaqqinneqalerpoq, politiit aamma nammineq misissuinermik ingerlataqarput.

Tatiginninneq pingaaruteqarpoq
- Qaammatit kingulliit ingerlanerini peqqumaasiviit naatsorsorneqartarnerini naatsorsuutini kukkunerup annertussusaa paasisaqarfigilluarsimallugu isumaqarpugut. Kukkuneq qujanartumik ingerlatsinermut tunngatillugu ukiuni arfineq-marlunni kingullerni sunniuteqarsimavoq, kukkunersiuisut kukkuneq misissorlugulu paasineranut peqatigitillugu, tassanilu paarisanik peqquserlunnikkut ajunaaruteqartitsisoqanngitsoq imaluunniit assingusumik aningaasaqarnikkut pissusissamisuunngitsumik iliuuseqartoqarsimanngitsoq inerniliunneqarpoq, Lars Borris Pedersen, Sermitsiaq.AG-mut taama allappoq.

- Kisianni tamanit KNI-mut tatiginninneq pingaaruteqarpoq, taamaammat attuumassuteqanngitsumik misissuinermik aallartitsisoqarpoq, siulittaasoq taama oqarpoq.

Aammattaaq aviisi Sermitsiaq saqqummertussaq atuaruk, tassani KNI-mi pissutsit pillugit pasineqarnerulersitsisunik saqqummiussissaaq.