KNI-p aningaasarsiorfissat nutaat ujartorpai
Nunaqarfinni pisiniartukinnerulernera iluarsaassinernilu kinguaattoortoqarnera nalimmassarfiginiarlugu, KNI-p niuernikkut periarfissat nutaat ujartorpai.
KNI-p ukiumut naatsorsuutit kioq manna siusinnerusukkut saqqummiummagit, ingerlatseqatigiiffiup aamma piffissamut 2023-miit 2026-mut periusissiaq nutaaq saqqummiuppaa. Suliniutip suliffeqarfiup inuiaqatigiinni patajaatsumik kiffartuussinissaanik qulakkeerinnissaaq, KNI-llu aningaasaqarneranut pitsaanerusumik ingerlatsinermik qulakkeerinneqataassalluni.
- Periusissamik suliniuteqarnermi KNI-p aningaasarsiornermut tunngatillugu pilersuisutut isiginiannginnerullugu, niuertutulli isiginiarnerullugu ingerlanneqarsimavoq, KNI A/S-imi pisortaaneq Jeppe Jensen Sermitsiaq.AG-mut oqarpoq.
Suliffimmi kulturi
- Suliffeqarfimmi kulturimut tunngassuteqarluinnarpoq, tamannalu piffissamik atuiffiussaaq. Niuerfiit nutaat ineriartortittariaqarpavut niuernerlu pisariaqartitsiffiusuni naleqqussarlugu. Suliassarpulli pingaarnerpaaq, tassa nunami innuttaasut tamarmik inuuniarnermikkut pitsaasumik atugaqarnissaat ineriartornermullu tapersersuinissarput, sumi najugaqarneq apeqqutaatinnagu, Jeppe Jensen oqarpoq, nassuerutigalugulu oqimaaqatigiissaarinissaq pisariaqartoq.
- Periarfissanilli nutaanik misissuinissamut isumassarsianillu nutaanik misileraanissamut sapiissuseqarneq inerisarusupparput. Suliat ilaanni tamanna eqqorluarsimavarput, isumassarsiat allat pitsaanerusinnaasimagaluarput periarfissaanngivissimasimallutilluunniit, oqarpoq.
Suleqatigiinnerit
Maannakkut misissuiffigineqartut ilagaat suleqatigiinneq pillugu isumaqatigiissutit atuuttut.
- Suleqatigiinnerit nalituujusarput, suleqatigiit suleqatigiinnerminni pissarsineruunnarnatik, aammali suliamik naammassinneqataasimagaangata. Suliat ilaani isumaqatigiissutinik naleqqussaasariaqartarpugut, allatigulli pitsaanerusunik periarfissarsiortarluta, pisortaq oqarpoq.
Jeppe Jensenip KNI Engros, immiaaqqanik imermillu tuniniaanermik annerusumik suliaqartoq, tikkuarpaa. Poortuutissanut nalunaarut nutaaq tunngavigalugu KNI-p suliffeqarfittut "isertitatigut malunnaatilimmik ajortumik sunniuteqaateqassasoq ilimagisinnaavaa".
Aaqqiissutissaq pitsaasoq
- Nuuk Imeq suleqatigigatsigu nuannaarutigisimavarput, kisiannili tamatumani nutaarluinnarnik suleqatissarsiortariaqarsimavugut. Isumaqarpugut tamatumani aamma pitsaasumik aaqqiissuteqarsinnaasimalluta, taamaalilluta immiaaqqanik imermillu tuniniaasarnitsinni puukut isumagineranut aningaasartuutit annaasaqaatigisagut annikinnerpaamiitsissinnaallugit,Jeppe Jensen oqarpoq.