KNI-p annaassiniarnissamut pilersaarusiaq utaqqisariaqarpaa
Naatsorsuutigineqaraluartutut KNI-p Namminersorlutik Oqartussat peqatigalugit ukiup nikinnissaa sioqqullugu siunissaq ungasinnerusoq eqqarsaatigalugu annaassiniarnermut pilersaarusiornissaa iluatsinngilaq. Namminersorlutik Oqartussat KNI-llu pisortaata nassuerutigaat suliffeqarfik Namminersorlutik Oqartussanit pigineqartoq maanna kiffartuussinissamut isumaqatigiissummi atugassarititaasut atuukkallartillugit siunissaa neriunartoqanngitsoq.
KNI A/S-ip siorna aggustimi ukiumoortumik naatsorsuutit saqqummiummagit naatsorsuutigineqarpoq 2024 sioqqullugu Namminersorlutik Oqartussanik nutaamik isumaqatigiissuteqartoqarsinnaassasoq. Tamannali iluatsinngilaq, pisortaaneq Jeppe Jensen Sermitsiaq.AG-mut oqarpoq.
- Kiffartuussinissamut isumaqatigiissutit inissipput, siornatulli atugassarititaasut akiliutissallu isumaqatigiissutigineqarput. Siunissami unammilligassat kiffartuussinissamut isumaqatigiissutini sammineqanngillat, ukiumilu nutaami kiffartuussinissamut isumaqatigiissutit suliarineqarpata sammineqassapput, Jeppe Jensen oqarpoq.
Pisiniartut ikinnerusut
KNI-p ajornartorsiutigaa pisiniarfiutimini pisiniartut ikiliartuinnarnerat. Ukiumi 2000-imiit ullumimut innuttaasut 6000-inik ikileriarsimapput, tamannalu ingerlatseqatigiiffiup niuernikkut tunngavianut ajoqutaavoq. Tamatuma saniatigut ingerlatseqatigiiffik Namminersorlutik Oqartussanit pigineqartoq millionilikkaanik akeqartumik iluarsaassinissamik kinguaattooruteqangaarpoq. Quersuit pillugit naatsorsuutini peqquserluttoqarnerani kanngunartuliaq pissutigalugu ingerlatseqatigiiffik ukiorpassuarni ilimagineqartumit iluanaaruteqarpallaanngitsoq erserpoq, tamatumalu kingunerisaanik akileraarutit suli akilerneqanngitsut 435 millionit koruuninik nalikillisimavoq.
Jeppe Jensen ukiumoortumik nalunaarusiami kingullermi allappoq Uummannami Upernavimmilu inuussutissarsiorneq ineriartorluarsimassasoq, sumiiffinnili allani aningaasaqarniarneq annikilleriartoq.
- Tassuunakkut isertitaqarniarneq tatineqarpoq. Tamanna KNI-p pisiniarfinnut quersuarnullu aningaasaliissutinik pisariaqartunik nammineq aningaasalersuisinnaaneranut sunniuteqarpoq, pisortaaneq oqarpoq.
Suliassaq pingaarutilik
Tamanna pissutigalugu Namminersorlutik Oqartussat ingerlatseqatigiiffiullu isumaqatigiissummik nutaamik isumaqatigiissuteqartariaqarnerat nalunaarusiami erseqqissarneqarpoq, ima nangilluni: “Oqaloqatigiinneq tamanna aallartippoq, naatsorsuutigaarpullu 2023-p naannginnerani tamanna naammassineqarumaartoq.”
Namminersorlutik Oqartussat aamma nassuerutigaat nutaamik, siunissamut isigisumik, periuseqartariaqarlutik. 2022-mut Nunatta Karsiata Naatsorsuutaanit, 2023-mi maajip aappaani inaarutaasumik naammassineqartumit, taamanikkut Aningaasaqarnermut Naalakkersuisoq Naaja H. Nathanielsen ima allappoq:
“KNI A/S-ip ingerlaannarnissaanik qulakkeerinninniarluni siulersuisunut allattoqarfik 2022-mi suleqataavoq, quersuarni nioqqutissanik peqquserluttoqarnera pissutigalugu. Suliaq 2022-mi ilassutitut aningaasaliissuteqarnikkut aaqqinneqarsimagallarpoq, tamatumalu kingunerisaanik ingerlatseqatigiiffiup 1 milliard koruunit sinnerlugit taarsigassarsisitsisunut pisussaaffini naammassisinnaanngorpai. Suliffeqarfissuup aningaasaqarnikkut tunngaviata siunissaa ungasinnerusoq eqqarsaatigalugu qulakkeerneqarnissaa 2023-mi naammassineqarnissaa naatsorsuutigineqarpoq.”
Taamaattumik aaqqiissutissamik nassaarnissap pisariaqartinneqarnera erseqqilluinnaraluartoq suli aaqqiissutissarsisoqanngilaq.
Neqi suli qulaajarneqanngilaq
KNI-p nioqqutissanik immikkoortortaqarfia kisimi ajornartorsiunngilaq.
Kujataani toqoraavimmi, piginneqatigiiffimmi KNI-mit aqunneqartumi Neqi-mi, aningaasatigut pissutsit ima ajortigaat ukiumi naatsorsuusiorfiusumi kingullermi 2,5 millionit koruuninik amigartooruteqarluni. Tamanna pivoq KNI-p iluani peqquserluttoqarnera pissutigalugu nammineq aningaasaatit sinneqartoorfiunngitsut amigartoorfiungaarmata.
- Neqi qanoq sanarfineqassanersoq suli aalajangerneqanngilaq, Jeppe Jensen Sermitsiaq.AG-mut oqarpoq nangillunilu:
- Assigiinngitsunik periarfissaqartoqarpoq – ilaatigut piginnittut amerlineqarsinnaanerat. Tamanna suli oqallisigineqarpoq, taamaattumik maannakkut annertunerusumik oqaaseqarsinnaanngilanga.