KNI pisortartaava: Immikkorluinnaq ippoq
Marsip aallaqqaataani suliffeqarfissuarmi KNI A/S'imi Claus Jensen 57-inik ukiulik sulilissaaq
Qaammat ataaseq qaangiuppat Claus Jensen, niuernermik pilersuinermik ingerlatsivik KNI A/S pisortaanertut atorfiniffigissavaa.
Tamanna ullumi nittartakkatsinni oqaluttuaraarput.
Claus Jensen danskit tuniniaanermik suliallit akornanni isiginiarneqartuuvoq, ilaatigut ulluinnarni atugassanik pisiniarfeqarfimmi Fakta A/S'imi angusani pillugit, taassumammi pisortaanerani 2008-miit 2008-mut kaaviiaartitat marloriaammik amerlivai 8 milliardinngortillugit assorsuarlu kinaassutsimik ersarissaalluni.
- Kalaallit Nunaanni sulinissara qilanaareqaara nunami alutoriuaannarnikuusanni. Taamaaliorpunga pinngortitarsuaq kulturilu pissutigalugit kisianni aamma pissutigalugu KNI suliffeqarfissuummat pissanganartoq siulersorneqarnermigut unamminartorpassualik, Claus Jensen oqaluttuarpoq.
- Siornatigut suliffigisarsimasanni soorunami akisussaaffik angisooq misigisarnikuuara, uannulli immikkorluinnaq ippoq nunamut ataatsimut suliffeqarfissuaq taama pingaaruteqartigisoq siuttuuffigilissallugu.
- Suliffeqarfissuaq ingerlalluareersup ineriartorteqqinnissaa assorsuaq qilanaaraara. Suliffeqarfissuaq ukiuni 300-nik oqaluttuassartalik taamaattorli anguniagaqartoq. Minnerunngitsumik qilanaaraara suleqatigiligassama inuiaqatigiillu ilikkarnissaat, Claus Jensen tikkuaavoq.
Ukiuni 30-t miss. pisortatut suliffeqartarnermini, suliassaqarfimmi pisortaanerit misilittagaqarnerpaat ilagaat. Kingullermik pisortaaneruffigaa aningaasaateqarfiit pigisaat naalungiarsunnut pisinniarfeqarfik Babysam A/S.
2008-mi Claus Jensen, Faktap pisortaaneratut ingerlaannaq atuutilersumik tunuarpoq, siunnerfeqarluni anguniakkamik pilersaarut pillugu siulersuisunik isumaqatigiinngissuteqarnerup kingorna.