KNI Polaroil aqqutigalugu aningaasanik isaatitsilluarpoq
KNI ukiup affaanut naatsorsuutimini 172 millionit koruuninik sinneqartooruteqarpoq. Polaroilimi kaaviiaartitat qaffariarujussuarnerannik angusaq pissuteqarpoq.
Ukiuni arlalinni perulluliorfiunerata, kingornatigullu naatsorsuutinik iluarsaasoqarnerata kingorna KNI maanna ukiup affaata pitsaasumik angusaqarfiusimanera nalunaarutigaa, tassanilu 172 millionit koruuninik sinneqartooruteqartoqarpoq.
Ukiup affaani naatsorsuusiorfiusumi kaaviiaartitat 1.603 mio. kr.-upput. Ukiup siuliani ukiup affaanut naatsorsuiffiusumut sanilliussigaanni 362 mio. kr.-nik qaffariaateqarlutik. Nammineq aningaasaatit 1.403 millionit kr.-inut naatsorsorneqarput.
Naatsorsuutini pissusissamisuunngitsumik iliuuseqarnerit pissutigalugit ingerlatseqatigiiffiup siornatigut ukiup affaanut naatsorsuutaasimasunut sanilliunnianngilaat, akerlianik ukiumi 2021/2022-mi naatsorsuiffiusumi angusat 90 millionit koruuniusut maluginiaqquaat. Tamannalu ukiup affaani siulliinnarmi qaangerujussuarneqarpoq.
Uuliami tunisineq aatsaat taama annertutigisoq
Nioqquteqarnermik ingerlatsiviup 6 procentinik kiisalu ikummatissaqarnermik ingerlatsiviup 65 procentinik kaaviiaartitaqarnerulernerannit pivoq.
Naatsorsuutinik iluarsaanerup kingorna maannamut angusat naatsorsuutigisamit pitsaanerusut, KNI tusagassiuutinut nalunaarummi allappoq, tamannalu pingaartumik umiarsuit takornariartaatit coronap kingorna uteqqissimanerannik pissuteqartoq:
- Polaroilip umiarsuit orsernissaannut orsussap nunarsuarmi akigitinneqartunut pisiarinikuusaa umiarsuarnut takornariartaatinut, aatsaat taamatut amerlatigalutik tikittunut, tuninikuusaa kiisalu Pilersuisumi amerlanerusunik tunisaqarsimanikkut KNI-p ukiup affaanut naatsorsuutaanut pitsaasumik kinguneqarpoq.
Akinik qulakkeerinninneq naammagisimaarnartoq
- Ikummatissaasivinni, pisiniarfinni quinilu iluarsaassinissamut aningaasat pisariaqartikkatsigit takornariat aningaasanik taama amerlatigisunik isertitaqarnitsinnut iluaqutaasinnaasimammata tamanna nuannaarutissaavoq, KNI allappoq.
Atuisut 2022-p ingerlanerani nunarsuarmi ikummatissap akitsoriartornerannik malugisaqarsimanngitsut, ingerlatseqatigiiffiup naammagalugu allappoq, tamanna KNI-p akit qaffannginneranni akinik qulakkeerinnilluni isumaqatigiissuteqarneranik pissuteqarpoq.
KNI ukiup naatsorsuiffiusup 2022/23-p affaani kingullermi ukiup affaanut siullermut sanilliullugu angusassani ikinnerussasut naatsorsuutigaa, tassa takornariat ilaatigut ikinnerusussaanerat pissutigalugu.