KNI sinneqartoorujussuarpoq
2011-mi sinneqartoorutit 2010-mi sinneqartoorutinit ikinnerulaaraluartut selskabi namminersorlutik oqartussanit pigineqartoq ukiumi angusarissaarpoq
Akileraarutit suli ilanngaatiginagit 62,1 milllioner koruunit.
KNI 2011-mi taamatut amerlatigisunik sinneqartooruteqarpoq, ukiumi naatsorsuiffiusumi siuliani 67,7 millioner koruuninik sinneqartooruteqarsimalluni.
Tamanna saqqummiunneqarpoq pingasunngormat KNI-p ataatsimeersuarnerani.
- Ukiuni siuliinisussaaq siunissami Pilersuisumi nioqqutissanut immikkoortoqarfik sammineqartorujussuussaaq. Ingerlatsiviup pisisartui ikiliartorput, Pilersuisullu immikkoortoqarfiata unammilligassarsua tassaassaa pisiniarfiit ataasiakkaat tamatumunnga naleqqussarnissaat, namminersorlutik oqartussanit tusagassiorfinnut nalunaarummi allassimavoq.
- KNI A/S-imi naatsorsuutit nioqqutissaasivimmiittut naatsorsornerannik ajornartorsiuteqarnermik pitsaanngitsumik sunnerneqarsimapput. Taamaattumik selskabip siunnersorti avataaneersoq peqatigalugu niueriaaseq aammalu ataani pilersuisut iliuuseqarfiginissaat kiisalu quersuarmiititsisarneq misissorniarpai.
Naalakkersuisut siulersuisuni ilaasortamik nutaamik toqqaapput. Ilaasortanngorpoq Marianne Wiinholt, nukissiornermik selskabimi Dong Energi A/S-imi aningaasaqarnermut immikkoortoqarfimmi pisortap tullia. Tamatuma saniatigut kukkunersiuisuuvoq naalagaaffimmit akuerineqartoq - taamaattumillu aningaasanik aqutsinermi uuliasiornermilu siulersuisut ilisimasanik piginnaasanillu pilersorsinnaavai.
Siulersuisut maanna ima isikkoqarput:
Michael Skourup (siulittaasoq)
Vagn Andersen
Karen Sofie Hansen-Hoeck
Lotte G. Lundberg
Jens Kristian Therkelsen
Marianne Wiinholt
Jonas Aronsen (sulisut toqqagaat)
Inger Eriksen (sulisut toqqagaat)
H. P. Lynge-Larsen (sulisut toqqagaat)