København avaqqutiinnarlugu Billundiliarit
Air Greenlandip Billundimut aqqut nutaaq ammarpaa. Tamanna nunatsinnut nunatsinniilluangalariaatsinik misissuinerup kinguneraa. AG angalaqqaarnermi qaaqqusaavoq.
2013-imi Air Greenland Aalborgimut timmisartuussinermik misiliivoq. Timmisartuutileqatigiit Københavnimit allaanerusumut timmisartuussisimanngillat. Taamanikkulli timmisartunut atuagassiaq check-in.dk allappoq Aalborg Billundiunngitsorlu toqqarneqarsimammat uissuumminartoq. Maannakkut ukiut qulit qaangiummata Air Greenland Billundimukartarnissamik misiliivoq.
Tamanna sapaatip-akunnerani qaangiuttumi pingasunngornermi Billundip mittarfiani ullaarnganiit nalliussineqarpoq champagnemik kaaginillu sassaalliisoqarluni oqalugiartoqarlunilu.
- 2019-imi nunatsinniit nunatsinnullu angalasutta angalariasiisa misissorneranni paasivarput ullumikkut Kangerlussuup Københavnillu akornanni timmisartumut ilaasartut ilarparujussui Jyllandimut ingerlaqqittartut, Billundimi isaarissap saavani aappaluttumik natersualimmi Air Greenlandimi niuernermut attaveqarnermullu pisortaq Katja Vahl oqalugiarnermini oqarpoq.
Air Greenlandimi kiffartuussivimmiit Heinrich Møller kalaallisut oqalugiarpoq. Billundip mittarfiani pisortaanerup Jan Hesselagerip oqalugiaammini kisitsisit itisilerpai.
- Region Midtjyllandimi Region Syddanmarkimilu sullitatsinni kalaallinit kingoqqisut 8.000-it missaat najugaqarput, pisortaq oqarpoq nangillunilu:
- Tupaallaatiginerpaavara paasigakku najugarisatsinni qallunaat 400.000-ngajaasugut Kalaallit Nunaanni ilaqutaqartugut imaluunniit attaveqartugut, Jan Hesselager oqarpoq.
- Ullumikkut Billundip mittarfia sinnerlugu Billundip Kalaallit Nunaatalu akornanni aqqutip attaveqaatillu ammarsinnaanera ataqqinaataavoq. Aqqutaavoq Billundip mittarfianut annertuumik sunniuteqartussaq, piffinnullu nutaanut ammaalluta. Saniatigut sumiiffimmut avatangiiserisatsinnut Danmarkip kitaani najugaqartunut tikeraanulluunniit annertuumik pingaaruteqassaaq, oqarpoq.
Timmisartoq nerukitsoq, sulisut nuannersut
Pingasunngornikkut Jettime atorlugu sapaatip-akunneranut ataasiarluni Billundimit aallartoqartassaaq. Tuukkaq arlalitsigut pingasunngornikkut US Airfocemik timmisartuussisarpoq, taamaattumik Billundimut aqqummi Tuukkaq atorneqarsinnaanngilaq. Ajoraluartumik, Jettimemimmi timmisartoq Tuukkamit pissanganannginneruvoq. Tuukkarmik Danmarkiliarneq iluarusunnaqaaq – siullermik anigasuartarfiup eqqaani issiavunga niunnut inissaqarluarlunga. Iluaq! Aappaattut inissaqarluarpoq. Ima paasillugu Tuukkaq Norsartut timmisartup qeqqatigut marlunnik ingerlaarfeqarpoq, Jettimemi ingerlaarfik ataasiinnaavoq issiaviillu pingasut sanileriiaallutik, nerukeqalutik, ingammik pualavallaalaaraanni saniatigullu kalaallinit nalinginnaasunit anginerulluni.
Ilaasoq Mogens Vestergaard aamma angutaavoq angisooq, igalaap eqqaani issiasoq taamatulli misigisaqanngitsoq.
Allaaserisaq tamaat AG-mi sapaatip-akunnerani saqqummersumi atuaruk, uani:
