Københavnimi Aarhusimilu suliffeqarfiit saqqummersitsinersuat
Arfininngorneq sapaallu suliffeqarfiit pisortallu ingerlatsivii kalaallinut Danmarkimi ilinniartunut pilerinarsassapput. Neriuutigineqarpoq ilinniartut ilinniarnertik naammassereerunikku amerlanerpaat nunatsinnut angerlarumaartut.
Kalaallit Nunaat piffissami matumani nunarsuarmi oqaluuserineqarnerpaat ilagaat, nuna alaatsinaaqqissaarneqarpoq, tamannali naammanngilaq, tassami nuna sanilerisaq naalagaaffissuaq USA suleqatiserinnilluni annikigisassaanngitsumik tigussaasumillu qaninngoorpoq, suleqatigiinnerullu annertusarneratigut qularutigisassaanngitsumik aamma suliffiit nutaat pilersinneqartalereerlutillu pilersinneqartussaassapput.
Taamaattorli aamma piviusuuvoq Kalaallit Nunaat, innuttaqassutsimigut nunarsuarmi nunat minnerpaarpaannut ilaammat. Ilaatigut tamanna pissutigalugu sulisussat suliffissaminnut naleqquttumik ilinniarsimasut nunatsinni suliffeqarfinni suugarluartuniluunniit amigaataappput.
Tassa nunatsinni suliffeqarfiit ullut tamaasa sulisussameerput, taakkulu piumanerungaarpaat sulisussat nunaqavissut.
Suliffeqarfiit 30-it missaanniittut
Taamaammat suliffeqarfiit pisortallu ingerlatsiviisa ataatsimoorlutik kalaallit ilinniartut attaveqarfigilluassallugit pingaartippaat taakkununngalu nukinnik piffissamillu atuinissaminnut tunuarsimaanngillat, soqutigivaammi kalaallit ilinniareerlutik naammassinermik kingorna nunatsinnut utissasut.
Ukioq manna suliffinnik saqqummersitsinersuarni suliffeqarfiit pisortallu ingerlatsivii 30-it missaannik amerlassuseqartut sapaatip akunnerata naanera manna atorlugu kalaallit Danmarkimi ilinniartut oqaloqatigissamaarpaat, aaqqissuussinerlu ukioq manna Københavnimi Aarhusimilu ingerlanneqartussaavoq.
Ilinniagaqartorpassuit nalunaarput
Suliffeqarfiit saqqummersitsinerat pingaartumik kalaallinut Danmarkimi ilinniartunut sammititaavoq, taamaattorli aamma kikkulluunniit Kalaallit Nunaanni sulilernissaminnik soqutiginnittut periarfissaqassapput suliffeqarfinnik naapitsissallutik.
Saqqummersitsinerit sioqqullugit ilinniartut peqataanissaminnut siumoortumik nalunaarnissaminnut periarfissaqarnikuupput – Københavnimi saqqummersitsinissamut ilinniartut 50-it tungaanut amerlassuseqartut nalunaarsimapput Aarhusimilu ilinniartut 72-it nalunaarsimallutik.
Suliffeqarfiit ingerlatsiviillu saqqummersitsinermi peqataasut:
- Air Greenland A/S
- Arktisk Kommando
- Avalak
- Avannaata Kommunia
- Inatsisartut siulittaasoqarfiata allattoqarfia
- Ilinniartunut siunnersuisarfik ”Aqqut”
- Peqqissutsimut naalakkersuisoqarfik peqqinnissaqarfillu
- Ilinniartitaanermut, kultureqarnermut ilageeqarnermullu naalakkersuisoqarfik
- Aatsitassanut suliffeqarnermullu naalakkersuisoqarfik
- Kalaallit Illui Danmarkimiittut
- Disko Line aamma Topas Travel
- Nunatsinni sulisitsisut GE
- Grønlandsbanken A/S
- Kalaallit Nunaanni politiit
- Kommune Kujalleq
- Kommune Qeqertalik
- Kommuneqarfik Sermersooq
- Mittarfeqarfiit
- Niuernermik Ilinniarfik
- Perorsaanermik Ilinniarfik
- Polar Seafood A/S
- Qeqqata Kommunia
- Royal Arctic Line A/S
- Royal Greenland A/S
- Pinaveersaartitsinermut isumaginninnermilu pissutsinut aqutsisoqarfik
- Tele Greenland A/S
- Kalaallit Nunaanni Brugseni
- Naalakkersuisut siulittaasuata naalakkersuisoqarfia
- Aningaasaqarnermut sulisoqarnermullu aqutsisoqarfik