Kommuneqarfik Sermersooq inatsisaatsoq
Tasiilami inuussutissarsiutigalugu piniartut snescooterit piniariarfimmukartarnerat akornutigaat, tamakku angallannerat inatsisitigut killilersugaanngimmat.
Tasiilami qimussimik piniartut aalisartullu pinngortitami snescooterinit nipitoqisunit akornusersorneqartarput. Saniatigooralugu piniartup Egon Poulsenip snescooterit qimussit illerngisigut ingerlaarsinnaajuassappata piniagassat ikilinissaat ernummatigaa.
– Piniartut piniariartarfinnut qimussimik aqqutaat snescooterinit aqqutigineqartarput.
Egon Poulsen oqarpoq, assersuusiorlunilu ulluni sisamani piniariartarfimmi nunaqarfikumi Qernertuarsunni unnuisaqattaarnerminni snescooterit katillugit arfineq- marluk piniariartarfimmut tikissimasut oqaatigalugu. Qangaanerusoq Tasiilap qanittuani snescooterit sikumut aqqarnissaat inerteqqutaavoq, maannali sumiluunniit angalasinnaaatitaapput.
Tasiilap Kommuneqarfik Sermersuumut ilanngunnerata kinguneraa inuit snescootererlutik kiffaanngissuseqarlutik sumiluunniit angalasinnaalernerat. Tasiilami politiit pisortaat Kristian Sinngertaat oqarpoq, Ammassalik kommuniugallarmat angallannikkut inatsisit maanna atorunnaarsimasut.
– Kommunit kattussuutereermata siornatigut angallannikkut maleruaqqusat tamarmik atorunnaarnikuupput, Kristian Sinngertaat oqarpoq.
Taama qimmit qimuttut amerlatigigaluartut maanna tigussaasumik inatsiseqanngilaq. Kommunit aaqqissuuteqqinneqarneranni angallannermut inatsit tulluussarneqaqqissasoq, Kommuneqarfik Sermersuup, kommunalbestyrelsiani ilaasortaq Harald Bianco, (Inuit Ataqatigiit), oqarpoq.
– Angallannermut inatsisit qangarnitsat suli nutaanik akuerisaasumillu peqalernissaata tungaanut atorallartariaqarput, Harald Bianco oqarpoq.
Tasiilami nunaqarfiinilu qimmit qimuttut 1146-pput, qimmilerisoq Henrik Andreassen oqarpoq.
SERMITSIAQ NR. 14 ATUARUK...