Kommuneqarfik Sermersuumi pisortaq alla aamma suliunnaarsinneqartoq

Kommuneqarfik Sermersuumi Sanarfinermut Avatangiisinullu Ingerlatsivimmi pisortaq Alex Nørskov suliffimminit tunuartinneqarallarluni angerlartinneqarallarsimavoq.

Kommunimi pisortaanerup Ole Jakobsenip tamanna Sermitsiaq.AG-mut uppernarsarpaa.

Tamanna pivoq 2021-p naalernerani, illuatungeriillu tusaraniarfigineqarnerat maanna ingerlavoq.

Kommunimi pisortaanerup sulisumut ataatsimut tunngatillugu suliaq pineqarmat, pissutaasut erseqqinnerusumik ilisimatitsissutigisinnaannginnerarpai.

Atorfiit qaffasissut pingasut inuttaqanngitsut

Kommunimi pisortaanerusimasoq Lars Møller Sørensen aamma Sanarfinermut Avatangiisinullu Ingerlatsivimmi pisortaasimasoq soraarnissamik 2021-mi aasakkut kommunimik isumaqatigiissuteqarsimapput.

Sermitsiaq.AG-mit 2021-mi novembarip qaammataani oqaluttuarineqarpoq, Lars Møller Sørensen Hans Henrik Winter Johansenilu kommunimi piginnaatitaaffimminnik unioqqutitsisimasutut politiinut unnerluutigineqarsimasut.