Kommuni umiarsualivinnut akigititanik eqqussiniarpoq
Umiarsualiviup Sisimiuniittup aserfallatsaaliornissaanut umiarsualivinnut akigititat Qeqqata Kommuniata iluaqutigissavai.
Umiarsualivimmik ingerlatsisussamik umiarsualiveqarnermut ingerlatseqatigiiffimmik pilersitsinissaq Qeqqata Kommuniata kissaatigisimavaa.
Inatsisit tunngavigalugit tamanna pisinnaatitaaffigineqanngimmat, kommunip tamanna pisinnaatitaaffiginngilaa.
Kommunili umiarsualivinnut akigititanik atuutilersitsisinnaatitaavoq, umiarsualiviup ingerlanneqarneranut aserfallatsaaliorneranullu aningaasartuutinut matussusiinissamut iluaqutaasinnaasunik:
- Sisimiuni imarsiornermi inuussutissarsiornerup attatiinnarnissaanut ineriartorteqqinnissaanullu
nutarsaaneq ataavartumillu aserfallatsaaliuineq pisariaqarpoq. Tamanna ingerlatseqatigiiffinnut
namminersortunut, takornarialerisunut Qeqqata Kommunianullu iluaqutaassaaq, kommunimi ingerlatsivik Aningaasaqarnermut Ataatsimiititaliamut allappoq.
SIKUKI-p akigititai malikkai
Ataatsimiititaliap aggustip naanerani ataatsimiinnermini umiarsualivimmik atuinermut akigititamik atuutilersitsisoqarnissaa akueraa. Kommunalbestyrelsip tamanna inaarutaasumik aalajangiiffigisussaavaa.
Nuummi SIKUKI-p umiarsualiviinut akigititaannut assingusunik kommunep allaffeqarfia umiarsualivinnut akigititassatut siunnersuuteqarpoq. Siunnersuut piviusunngussappat ukiumut 1,7 millionit koruunit missaanni isertitaqarnissaq naatsorsuutigineqarsinnaavoq.
Peqataanik pisarialimmik aserfallatsaaliinissamut ingerlatsinissamullu aningaasartuutit ukiut tulliuttut ingerlanerini 13 millionit koruunit missaanni naleqarnissaat naatsorsuutigineqarpoq, Aningaasaqarnermut ataatsimiititaliamut saqqummiussami allassimavoq.
Umiarsualivimmut akigititaq Naalakkersuisunit akuerineqaqqaassaaq, akigititaqartitsinerlu RAL-imit umiarsualivinni oqartussaasutut aqunneqassaaq.
