Kommunit inuussutissarsiortullu suleqatigiipput,
tamannalu pitsaanerulersinnaavoq.
Tamanna Sermitsiap Sulisitsisut sineriammi
immikkoortortaqarfiini siulittaasunik apersuinermini paasivaa.
Kommunit inuussutissarsiortullu suleqatigiipput,
tamannalu pitsaanerulersinnaavoq.
Tamanna Sermitsiap Sulisitsisut sineriammi
immikkoortortaqarfiini siulittaasunik apersuinermini paasivaa.
- Kommunit namminersortullu assigiimmik
ingerlaqatigiittuaannanngillat, Kommuneqarfik Sermersuumi Sulisitsisut immikkoortotaqarfiani
siulittaasoq Bo Eriksen oqarpoq.
- Suliassaqarfiit suuneri apeqqutaallutik
suleqatigiinneq assigiinngitsorujussuuvoq. Oqaloqatigiinnissamut
piumassuseqartoqartarpoq, ajoraluartumilli oqaloqatigiinneq iliuuseqarnernik
kinguneqarneq ajorpoq. Aalajangiinerit najukkami inuussutissarsiortut naammattumik
peqataatinnagit suliarineqartartut amerlasuut misigisarput – ingammik
ineriartortitsinermut suliniutinut pilersaarusiornermullu tunngatillugu.
Illoqarfiit pingaarnersaat tatineqartoq
Bo Eriksenip illoqarfiit pingaarnersaanni
unammilligassat eqqaavai.
- Nunaminertat sanaartorfissat amigaataapput,
illoqarfiillu pingaarnersaanni aqquserngit tatineqaqqapput. Najukkami
inuussutissarsiortut pilersaarusiornermi – assersuutigalugu
suliariumannittussarsiuussinerni, sanaartornermut pilersaarutini assigiinngitsuni
kommunillu inuussutissarsiornermut periusissiaanni – aaqqissuussaanerusumik
siusissukkullu peqataatinneqartariaqarput.
- Aamma allaffissornikkut suliaqartoqaraangat
sivisuumik suliarineqartarnerat, allaffissornerup iluani sulisussaaleqineq,
digitaliseerinermi suliallu ingerlaneranni matoqqavallaartumik pisoqartarnera
unammilligassaraavut, Bo Eriksen oqarpoq.
Aqqaluk Abelsen, Kommune Kujallermi Sulisitsisut
immikkoortortaqarfiani siulittaasoq, aamma taama isumaqarpoq.
- Suleqatigiinneq kigaallarpoq. Kommunip
inuussutissarsiortut ukkatarinngippallaarpaat aamma ineriartortitsinermut
peqataarusuppallaarpasinngilaq. Suliffeqarfinnit isumassarsiat siunnersuutillu
malitseqartinneqartanngillat, aamma kommunip inuussutissarsiortut
suleqatigerusunneraat paasiuminaappoq. Inuussutissarsiortut siusissukkut
peqataatinneqarneq ajortut, aamma pilersaarutit pingaarnersiuinerillu pillugit
ersarissumik paasitinneqarnissaq ajornakusoortartoq misigisarparput.
Akissutisinissaq ajornakusoortartoq
- Pingaartumik teknikkikkut ingerlatsinermi
unammilligassaqarpoq. Akineqarnissaq ajornakusoortarpoq, allaffissornikkullu
suliarinninneq pisariaqanngitsumik sivisuallaartarpoq. Tamanna suliffeqarfinnut
suliniutinik angisuunik mikisunillu aallartitserusuttunut
suliniuteqarluarusuttunullu pakatsinarpoq.
- Inuussutissarsiornerup ineriartortinnissaanut
kommuni erseqqinnerusumik periusissiortariaqaraluarpoq, taamaalilluni
suleqatigiinneq ataatsimullu anguniagaqarnissaq ajornannginnerulissalluni.
Taamaattumik inuussutissarsiortut kommunillu pisariaqartitaat ataatsimut
paasiumallugit Sulisitsisut tungaannit teknikkikkut ingerlatsivik
oqaloqatiginiarlugu suliniuteqarpugut. Neriuppugut siunissami pitsaanerusumik
suleqatigiittoqalernissaanik kinguneqarumaartoq.
Aqqaluk Abelsenip kujataani kommuni
isornartorsioraluarlugu aamma iluatsittunik peqartoq erseqqissarpaa.
- Inuusuttut suliffeqartinniarlugit Siu-Tsiu-mik
suleqateqarneq assersuutissatsialaavoq, tassa ataatsimoorluni
piumassuseqaraanni qanoq angusaqarluartoqarsinnaatigineranut. Taamatuttaaq
Innovation South Greenlandimik oqaloqateqarneq. Taakkua marluullutik
nukissaqartoqartoq takutippaat, aamma kommunip siunissami pitsaanerusumik
suleqatigisinnaasaanik, Aqqaluk Abelsen oqarpoq.
Piumassuseqarluarneq
Avannaata Kommuniani Sulisitsisut
immikkoortortaqarfiani siulittaasup Jens Peter Parsip kommuni
suleqatigerusussuseqartoq, kisiannili anguniagassanik isumassarsianillu
piviusunngortitsiniarnera ajornakusoortartoq misigaa. Kommunip allakkatigut
akissuteqartannginnera Jens Peter Parsip aamma isornartorsiorpaa.
- Kommunimik ataatsimeeqateqartarnerput
pitsaasuuvoq, kisiannili anguniakkat aalajangersimasut kommunimullu
allakkatigut apeqquteqaraangatta akineqartarnissaq amigaataapput. Oqaatsitigut
attaveqatigiittoqartarpoq ingerlaqqissinnaasanngilagullu, taamaammallu
kaaverusaartutut illuta. Aammattaaq assigiinngitsunut iliuusissatut
pilersaarutit soorlu atuarfinnut, teknikkimut, attaveqarnermut allanullu
amigaatigaakka, Jens Peter Pars oqarpoq.
- Kommuni sorpassuartigut pitsanngorsaasinnaavoq.
Ingammik atuarfimmut tunngatillugu malitseqartitsisarnissaq kissaatigaara
inatsisit naapertorlugit taamaaliortoqartartussaammat. Akunnerit
atuartitsiffiunngitsut, paarlatsit, napparsimanerit allallu nakkutigineqartussaapput.
- Aamma kommunimi sulisut
atugarissaannginnerannut pissutaasinnaasut misissortariaqarput, soorlu
kommunalbestyrelsip novembari 2023-mi ataatsimiinnerani imaqarniliami
eqqaaneqartut. Suliffimmi atugassarititaasut unammillernarnerat atorfinnut
piukkunnaatilinnik qinnuteqarsinnaagaluit tunuarsimaarnerannik
kinguneqarsinnaapput.
- Siunissaq ungasinnerusoq eqqarsaatigalugu
pilersaarusiortoqartariaqarpoq aamma sanaartornermut, inissianut, utoqqaat
illuinut il.il. iliusissatut pilersaarusiortoqarluni, Jens Peter Pars oqarpoq.
Siulittaasoq naammagisimaarinnittoq
Qeqertallip Kommuniani Sulisitsisut
immikkoortortaqarfiani siulittaasup Søren Nezlo Helboe Hansenip kommunimik
suleqateqarneq naammagisimaarpaa, ingammik inuussutissarsiornermut
siunnersuisoqatigiinnut tunngatillugu.
- Aasianni qaammatit pingasukkaarlugit
ataatsimiittarpugut. Qeqertalik Business Council inuussutissarsiortut
kommunillu akornanni oqaloqatigiinnermut aaqqissuussisarpoq. Qeqertalik
Business Council aaqqissuussaavoq pitsaalluinnartoq, kommunimi inuussutissarsiortunut
iluaqutaangaartoq, Søren Nezlo Helboe Hansen oqarpoq.
Bo Eriksenimit Nuummiittumit isumaqatigineqarpoq,
taannalu ima oqarpoq:
- Kommunini inuussutissarsiortunik ataavartumik
oqaloqateqartarfinnik – atorfilittat ammasuugaangata
saaffigiuminartuugaangatalu – suleqatigiilluartoqartarpoq. Tamanna
tatiginnilersitsisarpoq sukkanerusumillu aaqqiissutissartoqarsinnaasarluni.
Kommunit ilaasa aamma ineriartortitsinermut suliniutinut suliffeqarfiit
namminersortut peqataaqqullugit qaaqqusarnerat pikkoriffigaat, tamannalu
piginnittuunermut pitsaassutsimullu pitsanngorsaataasarpoq.
Sulisitsisut Qeqertarsuup tunuani
immikkoortotaqarfia Aasianni Hotel Sømami inuussutissarsiornermut tunngasunik
tallimanngornermi ualikkut nalunaaqutaq 15.00 qineqqusaartitsissasoq, partiit
qinigassanngortitaannik peqataaffigineqartumik, Søren Nezlo Helboe Hansenip
paasissutissiissutigaa.
- Siullermeerluta taamatut aaqqissuussaqarpugut,
taamaammat tapersersorneqarnissarput qilanaaraarput. Kommunip
inuussutissarsiortullu suleqatigiinnissaat pingaaruteqarmat
neriuuteqarluarpugut, Søren Nezlo Helboe Hansen oqarpoq.
