Kujataa mininneqartutut misigisimasoq
Kommuni Kujallermi Inuussutissarsiornermut Suliffeqarnermullu Ataatsimiititaliami siulittaasup, Air Greenland Narsarsuup Københavnillu akornanni timmisartuussinissaminik taamaatitsiinnarnera isornartorsiorpaa.
Narsarsuarmiit Københavnimut, Københavnimiillu Narsarsuarmut aasaq manna toqqaannartumik angallassisoqartussaannginnera akuersaaginnarneqarsinnaanngitsoq Kommune Kujallermi inuussutissarsiornermut suliffeqarnermullu ataatsimiititaliami siulittaasoq isumaqarpoq.
- Kujataani angallanneq eqqarsaatigalugu Air Greenlandip sullissinermini kujataanik kingulliutitsiuarnera akuersaaginnarneqarsinnaanngilaq, tamannami takornarialerinermik suliaqartunut ulluni makkunani eqqugaaqqareersunut annertuumik sunniuteqarnerluttussaavoq, Inuussutissarsiornermut Suliffeqarnermullu Ataatsimiititaliami siulittaasoq Simon Simonsen (S) oqarpoq.
Air Greenlandip pingasunngormat nalunaarutigaa, nunap ammaqqinneqarnerani immikkoortumi siullermi, sapaatip akunneranut amerlanerpaanik 600-nik ilaasoqartarnissamik piumasaqaateqarneq pissutigalugu, Københavnip Narsarsuullu akornanni timmisartuussisarneq unitsillugu. Ilaasulli amerlassusaannik tunngavilersuinermi, kujaataata kingulliutariaqarneranik nassataqartariaqanngikkaluartoq, Simon Simonsen Sermitsiaq.AG-mut erseqqissaavoq.
- Oqartoqarsinnaavoq logistikki pilersaarusiornerlu pineqartut, aappaatigulli Kujataa avaqqunneqartuarpoq. Tamanna uggornarlunilu uuminarpoq, Simon Simonsen oqarpoq.
Takornariartitsisartunut sunniuteqarnerlussasoq
Erseqqissaatigaa, takornariartitsisartut coronap atugaaneranit tatineqareersimasut, Danmarkimullu toqqaannartumik aqqutip matuneqarneratigut tamanna ajornersulissasoq.
- Kangerlussuup Købenahvanillu akornanni bilitsit akisoqigamik, Kujataanit angalaniartunut killilersuingaatsiarput, taamalu aamma takornariartitsisartunut ajornartorsiutaalluni. Taamaammat Naalakkersuisunut apeqqutiginiarpara. Bilitsinut akisunerulersunut tapiissuteqartoqarniarnersoq?
Bilitsinulli tapiissuteqassagaanni aningaasanik naleqartarpoq, aningaasassaqartitsisoqanngilarli. Tamanna Aningaasaqarnermut Naalakkersuisup Vittus Qujaukitsup, coronap ajornartorsiortitsinerani nunap aningaasaqarneranik misissuinermut atatillugu erseqqissaatiginikuuaa.
Siumumilu politikkerip aningaasat suminngaannit pissarsiarineqarsinnaanersut erseqqissumik oqaatigisinnaanngilaa.
- Aningaasassarsiorneq ajornassaaq, tassanili isumassarsiortariaqarpoq pingaarnersiuillunilu. Assgiinngissitsinanimi, nunap tamarmiusup eqqarsaatigineqarnissaa pineqarpoq, Simon Simonsen naggasiivoq.