Kujataani aalisartut: 22 koruunit naammanngillat
Qaqortumi aalisartut 15-it sinnerlugit amerlassusillit ullaaq nalunaaqutaq 09.00 Narsamut Royal Greenlandimut akerliussutsimik takutitsiniartorlutik aallarput. Kujataani aalisartut Royal Greenlandip nipisat suaat ukioq manna kiilumut 22 koruuneqarnissaat siunnersuutigaat, tamannalu aalisartuniit akerlerineqarpoq.
Kujataani nipisat suanniarneq aallartereeraluarpoq, aalisarnerli suli aallartinneqanngilaq KNAPK-p Royal Greenlandillu akimik isumaqatigiisinnaannginnerat pissutaalluni. Royal Greenlandip kiilumut 22 koruuninik akeqartitsiniarnera naammanngilluinnartoq, aalisartut isumaqarput.
- Corona takkummat akit appartinneqarujussuarput. Kisianni ullumikkut Islandimi nipisat suaat kiilumut 60 koruuninik akeqartinneqarput, uagullu kiilumut 22 koruuniulluni. Nikingassut annertoorujussuuvoq. Sooruna Islandimi akigitinneqartut assigalugit tunisaqarsinnaanngitsugut, nunarsuarmi akit Islandimi kiilumut 60 koruuneqartinneqarneranut akiliisinnaasuseqarpata, Jens-Peter Kielsen, KNAPK-p Qaqortumi immikkoortortaqarfiani siulittaasoq oqarpoq.
Royal Greenlandip Kalaallit Nunaanni pissutsit nalilersuiffigiuartaraat, Royal Greenlandimi attaveqaqatigiinnermut pisortaq, Masaana Egede-p nassuiaatigaa,
- Kiilumut 22 koruuninik akeqartitsisinnaalluta naliliisimavugut nipisat suaat ukioq manna qanoq amerlatigisut tunineqarsinnaanersut apeqqutaatillugu. Suaat amerlasuut toqqorsivimmi uninngaanannginniassammata ukiullu tulliani annikinnerusumik tunisaqarnissarput pinngitsoortinniarlugu.
Nuna tamakkerlugu akerliussutsimik takutitsineq
Aalisartut Kalaallit Nunaat tamakkerlugu Royal Greenlandimiit akigitinneqartut akerleralugit akerliussutsimik takutitsisoqarpoq. Isumaqatiginninniarnerit nutaat aallartinneqartinnagit Royal Greenlandilu akimik nutaamik saqqummiussitinnagu aalisartut nipisat suaannik tunisaqarlutik aallartinnianngillat.
- Kujataani isertitarineqartartut pingaarnersaat ilagaat. Aalisariaanarsinnaanngilagut kiilumullu 22 koruuneqartillugit, tamanna akikippallaarpoq. Nunami sanilerisatsinni kiilumut qaffasinnerujussuarmik akeqartinneqarput. Naammagilerpagut - 22 koruunillu akuerisinnaanngilagut, Jens-Peter Kielsen erseqqissaavoq.
Ullaaq manna aalisartut Narsami akerliussutsimik takutitsinissaminnut piareersarput. Aalisartut aalassasimaarput akerliussutsimillu takutitsisussat akornanni nuannaartut malunnarpoq.
- Tusaaneqarusuppugut. Ilumoorsinnaanngilaq qaammammut nipisat suaannik 5.000 koruuninik taamaallaat isertitaqarsinnaasasugut, KNAPK-p Qaqortumi immikkoortortaqarfiani siulittaasoq oqarpoq.
Royal Greenlandimut akerliussutsimik takutitsinerit KNAPK-p aaqqissorpaa, tassani neriuutigineqarluni isumaqatiginninniarnerit ingerlaqqissinnaasasut. Illuatungeriit sapaammi isumaqatiginninniarnerit nutaat aallartissallugit isumaqatigiissimapput, taamaakkaluartorlu nuna tamakkerlugu akerliussutsimik ullumikkut takutitsisoqarpoq.
- Neriorsuutigineqarnikuuvoq akit pitsaanerulissasut nipisat suaat MSC meqqilerneqarpata. Taava aperisoqarsinnaavoq ilumut Royal Greenland akinik nalimmassaasarnersoq. Royal Greenlandip akimik tuninikuuaatigut isumaqatiginninniarnermiillu anilluni. Isumaqatiginninniarnerit aallarteqqikkusuppagut, aalisartugut akimik pitsaanerusumik tunisisalersinnaaniassammata, KNAPK-mi siulittaasoq Nikkulaat Jeremiassen oqarpoq.
Kalaallit Nunaanni nipisat suaat 2015-mi MSC meqqilerneqarput.
Royal Greenland naapertorlugu isumaqatiginninniarnermut tunngaviusut 2014-mi pilersinneqarsimasut KNAPK-mit malinneqarsimanngillat.