Aalisarneq
Kujataani avaleraasartoorniarnissamik takorluugaq ajalusoortoq
Qaqortumi aalisartut piniartullu peqatigiiffianni ilaasortat qulit avaleraasartoorniarnissamik pisassanik 8.000 tonsinik qinnuteqaataat Namminersorluni Oqartussanit itigartinneqarpoq – tamannalu annertuumik pakatsissutigineqarpoq
Qaqortumi Aalisartut Piniartullu Peqatigiiffianni, QAPP-mi ilaasortat qulit, Russit umiarsuaataannik marlunnik attartorlutik avaleraasartoorniarnissamik sinnattuat kusanartoq ukioq manna pisinnaajunnaarpoq, taamaattumillu suliniuteqartut suli sinnattuinnarallartariaqarput.
Avaleraasartoorniarnissamik suliniuteqartut Namminersoorlutik Oqartussanut pisassanik 8.000 tonsinik qinnuteqaataat qanittumi itigartinneqarpoq.
Søren Noahsen, QAPP-mi siulittaasoq, avaleraasartoorniarnissamullu isumassarsisuusoq, suleqatinilu ukiup annerpaataani pilersaarummik piviusunngortitsiniarlutik suliniuteqartut, itigartitsinermut annertuumik pakatsipput.
Suliniuteqartut umiarsuarnik marlunnik attartornermikkut kalaaliinnarnik sulisoqarnissaq siunertarigaluarpaata, aalisarnerlu juunip qeqqata missaani aallartittussatut naatsorsuutigineqaraluarpoq. Pilersaarutillu piviusunngortinniarnerani ukiup ilarujussuani piniarnertik unitsissimavaat, aningaasanillu annertunerusumik isertitaqaratik.
Taamaattumik allakkat pisassiissutissanik qinnuteqarnermut itigartitsissutaasut tiguneqarmata, pakatsineq angeqaaq.
- Allakkat itigartitsissutaasut tigungatsigut pakatseqaagut, qularutiginngikkaluarparpummi piumasaqaatit tamarluinnaasa naammassisimallutigit, Søren Noahsen oqarpoq.
Oqaatsit timitaqanngitsut
Aalisarnermut Piniarnermullu Naalakkersuisoq Karl-Kristian Kruse, Siumut, februarimi Kujataani piniartunik aalisartunillu ataatsimeeqateqarpoq. Kujataani aalisartut piniartullu inuuniarnikkut atugaasa qanimut ilisimasaqarfigineqarnerulernissaat angalanermi siunertarianeqartut pingaarnersaraat. Angalanerlu Kujataani QAPP-mi ilaasortanut annertuumik isumallualersitsisimagaluarpoq.
- Ukioq annetunerusumik piniariarneq ajorpugut suliniutitta annertuumik aallunnera pissutigalugu, taamaattumillu aningaasanik isertitaqarpiarsimanata. Taamaattumik pisassiissutissanik qinnuteqaatitta itigartinneqarnera assut pakatsissutigaarput, Søren Noahsen, QAPP-mi siulittaasoq oqarpoq.
Allaaserineqartoq tamaat aviisimi Tamanut Kujataanimi atuaruk. Kommune Kujallermi pisartut assigiinngitsut avisimi aamma atuakkit. Aviisi akeqanngitsumik ataani aajuk: