Aalisarneq
Kujataani misileraalluni saarullinnik aalisartoqaqqilersoq
Qaqortup kangerliumarngani Naalakkersuisut misileraalluni saarullinniarnissamik ammaasseqqipput
Nunatta kitaani 2016-imi saarullinniarnissamut kingumut periarfissaqaqqilerpoq, Naalakkersuisut aalajangermata Qaqortup kangerliumarngata avannaata avataani saarullinnik 5.000 tonsinik pisassiimmata.
Saarulliit tamaani ukiuni kingullerni utersaariartuaarput, 2015-imi misileraalluni aalisarneqaqqilerlutik, Namminersorlutik Oqartussat tusagassiuutinut nalunaarummi nassuiaapput.
Atuaruk: Saarullinniarnerup ajalusoorneranut pissutaasoq ilisimatuut paasivaat
- Nunatta kitaani 2016-imi misileraalluni saarullinniartitsissalluta aalajangerpugut, aalisakkat tunitsivinni suliffissaqartitsilluartarmata. Pingaartissimavarput pisassiissutigineqartut aalisariutinik sinerissap qanittuani aalisartartunit ningittagarsuutinillu aalisarneqarnissaat, Aalisarnermut, Piniarnermut, Nunalerinermullu Naalakkersuisoq Karl-Kristian Kruse oqarpoq.
Piumasaqaatit arlallit
Pisassiissutigineqartut tamavimmik, 100 procentimik tulaanneqartussaatitaapput, tunisassiorfinni nerpii saaneqanngitsunngorlugit tunisassiarineqartussaatitaallutik.
Misileraalluni aalisarnerup siunertaraa sumiiffiup aalisagaqassusia misissussallugu, taamaattumik piumasarineqarpoq sumiiffik siamasissumik misileraaffigalugu aalisarfigineqassasoq.
Aalisakkat qeritinnagit suliareqqitassanngorlugit tulaanneqartassasut aamma piumasaqaataavoq, aalisariutillu nunatsinneersut kisimik tulaassisinnaatitaallutik.