Kukkukuuaqqat ullormut 200 kiilut

Neqaarniaq sulerisarpa? Neqi sorleq mamarineqarnerpaava? AG-mit sapiiserluta Brugsenimi paasiniaavugut

Tre slagtere er i fuld gang med at skære,
marinere og pakke kyllingekød, mens de
hører rockmusik.
Neqaarniat pingasut rockimik tusarnaajutaa kukkukuuaqqap neqaanik agguileruttortut, akoorlugu poortorlugulu.

Tassaniittuarput. Nuup qeqqani Brugsenimiitilluni neqaarniat qaqortunik nutsanut puullit plastikkinillu aaqqatillit mamartuerniarfimmiittut saniaqqukkaanni.

Ullaakkut arfineq pingasunut niuertarfiliarpunga. Neqaarniat akunnerit marluk sioqqullugit suliartoreersimapput neqinillu piareersaaleruttulereerlutik. Neqi ullormi tassani Nuummiorpassuarnik qaarsilaartitsisussaq.

PISARTAGAQARTUNUT

Allaaserisaq una Nutaarsiassaqartitsivimmi aviisit naqitat ilaanni allaaserisaavoq.

Allaaserisat pisartagaqartunit siunissami taamaallaat atuarneqarsinnaajumaassapput.

Atuarluarna.

Neqit qulinut poortoreerlugit naammassisussaapput, sandwichit iffiallu illoqarfimmi Brugsenip niuertarfiinut allanut ingerlanneqartussat piareersarlugit. Niuertarfik Nuup qeqqaniittoq Nuummi Brugsenip niuertarfiisa qiteraat Qinngutsinni Brugsenimi, Brugsen Nataliemi, Nuukullammi Kongevejimilu nillartaartitsivinnik isumaginnittoq.

Casper Petersen har arbejdet i
Brugseni i snart 14 år.
Casper Petersen ukiuni 14-inngulersuni Brugsenimi sulisimavoq.

Neqaarniat pingasut kukkukuuaqqap neqaa agguleruttorpaat, akoorlugu poortorlugulu rockimik nipilersuutit tusarnaajutigalugit. Ilaat qungujulalluni qiimallunilu erinarsoqataavoq. Nuup affaa suli makinngitsoq neqaarniarfimmi ulapputeqaat. TIkilluaqqusaasutut misinnarpoq maanilu qiimanarlunilu qungujulanarpoq.

Ilinniartitaanermi neqip aggornissaa ilinniarneqartarpoq, nunarsuarmi niuerfimmi piumaneqartunut tulluarsagaasumik. Neqip pitsaassusaata aqunnissaa ilinniartarpaat suliassaqarfimmilu inatsisit maleruagassallu ilinniarlugit. Neqaarniat nalinginnaasumik toqoraavinni sulisarput.

Ilinniartitaanermi toqutsineq, neqimik agguillunilu saaniiaaneq ilinniarneqartarpoq.

Toqoraavimmi atorneqartussatut periutsit assigiinngitsut misilittagaqarfigilersarpatit. Neqilerinermi atortut assigiinngitsut atornissaat ilinniartarpatit, taamaalillutit uumasorsuit angisuut nammineq suliarisariaqarnagit.

Najoqqutaq: Ilinniartitaanermut ilitsersuut

- Neqaarniat ilinniarsimasut sisamaapput, igasoq ilinniarsimasoq ataaseq, ilinniartut marluk ilinniarsimanngitsullu marluk, Brugsen Nuummi neqaarniat naalagaat Casper Petersen oqaluttuarpoq.

Ukiuni sisamani neqaarniatut ilinniartoqartarpoq. 2010-miilli Brugsen Nuummi neqaarniat tallimat ilinniartinneqarsimapput aappaagulu ilinniartut marluk naammassissallutik.

Casper Petersen ukiuni 14-inngulersuni neqileriffimmiissimavoq. Taassuma AG-meersoq takuniaatippaa.

Niuertarfimmi aallartippugut. Eqqamiitsumik inoqanngilaq, ullaakkut taamaalinerani taamaallaat iffiorfik ammasarmat.

Niuertarfimmi ilorpasinnerulaartumi nillataartitsiviit takisuut ornippavut. Puulukit nersussuullu neqaat aserortikkat tassaniipput, kukkukuuaqqat qatii, nersussuup neqaa siatassaq, culottesteg, puulukip neqaanit koteletsit hamburgerryggillu. Ilami neqit assigiinngitsorpassuupput.

Delikatessen, der om et par timer, bliver propfyldt med sultne kunder.
Mamartuerniarfik akunnerit marlussuit qaangiuppata pisinianik kaattunik ulikkaartussaq.

Neqilerisup ullormut nersussuup, puulukip kukkukuullu neqaat kiisalu aalisakkat nerpii 500 aamma 600 kiilut missaanniittut passuttarpai sapaatillu akunneranut neqi 6.400 aamma 7.000 kiilu pissarsiarisarlugit.

- Kukkukuuaqqat nersussuullu neqaat tunineqarnerpaasarput. Ullormut kukkukuuaqqap neqaa 200 kiilut tungaannoortoq tunisarparput, Casper Petersen oqarpoq kukkukuuaqqallu qatii poortukkat tikkuarlugit.

- Neqi soqutigineqannginnerpaaq? Tassa qingalissuup neqaa, oqarpoq, neqilu qerititaanngitsutut eqqunneqartartoq tikkuarlugu.

- Neqi sequtsigaq allaanerusarpoq taarnerullunilu qeritinneqarsimatilluni. Uagutsinnut pingaartuuvoq neqip mamarunartuunissaa, neqaarniat naalagaat oqarpoq.

Poorski tunisaqarnartoq

Casper Petersen oqaluttuarpoq poorskikkunni neqinik tunisaqarnerpaasarlutik.

- Taamaalinerani inuit savaaqqap neqaanik pisiniartaqaat. Tamannalu peqqutigalugu ulapittaqaagut. Januaarip naanera aamma uagutsinnut ulapaarfiunerpaasarpoq, oqarpoq.

Mamartuerniarfimmut ingerlaqqippugut. Nuummiutut nalinginnaavoq ullup qeqqata missaani inunnik ulloqeqqasiutissaminnik pisiniartunik ulikkaartarnera.

- Ilaannikkut mamartuerniarfimmi pisiniat 300 tungaannoortarput, Casper Petersen oqarpoq.

Hellefisk, rødfisk og torsk ligger parteret og er klar til at blive købt.
Qalerallit, suluppaakkat saarulliillu tisaat pisiarineqarsinnaalersimasut.

Qaleralik, suluppaagaq saarullillu tisaat aamma pisiassaapput. Nataarnap nakkuppaanga. Aalisakkat amerlanersaat najukkami piniartuneersuupput, suluppaagaq avataaneersuulluni.

Neqileriffimmut ulapaarfiusumut ingerlaqqippugut. Sulisut ulapeqalutik sanioqquttarpaannga neqillu aggukkat akimut ersittumik poorsimasut tigumiarlugit akiinullu allagartat ikkuttarlugit.

Neqilerisup ulapeqisup saamiatungaaniippoq igafferujussuaq tassani ullormi nerisassat sandwichillu piareersarneqarlutik. Tassaniipputtaaq sulisut nuannaartut ullormi tassani tanitanik suliaqartut.

Sulisut angumersiniarlutik taniisut ulapeqisut takuniaatinneqarninnut qutsavigaakka.

Powered by Labrador CMS