Kulti Nunatsinneersoq piumaneqaqaaq
Nuummi kultimik pinnersaasiortoq Palle Møller Nalunami kultisiorfimmiit kultimik pissarsivoq ukiut arfineq pingasut qulit tulliuttut pinersaasiarisinnaasaminik. Tusatsiakkat suliaasa piumaneqarnerannut aamma iluaqutaasimapput
Kultimik pinnersaasiortoq Palle Møller tallimanngornermi tusagassiortunut takutitsivoq. Tassani Nalunami kultisiorfimmiit kulti aatsillugu ammalortuararpassuarnut aggorpaa. Kulti maanna aningaaserivimmi toqqorsimaneqarpoq kingorna pinnersaasiarineqarumaarluni.
Kulti kipparissoq 1 kilomik oqimaassusilik Iphonetut angitigiinnarpoq. Taanna aatsinneqarpoq ammalortuararpassuanngortinneqarluni.
- Kulti Kalaallit Nunaanneersoq piumaneqartorujussuuvoq. Inniminniisut amerlanerit Kalaallit Nunaanneersuupput. Aammali Danmarkimiit, Tuluit Nunaanniit, Sverige-miit USA-miillu inniminniisoqartarpoq, Palle Møller Sermitsiaq.AG-mut oqarpoq.
Kultiaraq
Katinnermi assammiutit piumaneqarluarput aammali pinnersaatit kultimik sanaat Nunattalu ujaraanik pinnersaasiassanik isillit piumaneqartarput.
- Pinnersaasiakka ilisimaneqarlualersimapput. Ilarpassuisa sanaassimasannit tusatsiakkat atorlugit ilisimalersimavaat ilaasalu nittartagara kassoq.gl atorlugu paasiniaasarput, Palle Møller oqarpoq.
Maanna kulti Nalunameersoq aatsillugu ammalortuararpassuarnut aggorneqareerpoq taamaasilluni Palle Møller sanasussanngoraangami kultiminermik aalliinnarsinnaalerluni. Kulti maanna aningaaserivimmut toqqorneqaqqereerpoq.
Kulti pillugu assit amerlanerit Sermitsiaq.AG-p qanittumi takusassiarissavai.