Kuultimik pinnersaasiortartoq inuit kulturiannik muteerniusumit isumassaarsiortartoq

Tuapannguani inissiarsuarni inimi kuultimik pinnersaasiortoq Nadja Arnaaraq Kreutzmann ini 10 kvadratmeteritut angissusilik kuultinik pinnersaasiornermi suliffittut atorluarsinnaasutut pequtsersorpaa, tassanilu atortussat tamaasa aningaasaliiffigai, Nuummilu pisisartunit inniminnikkat ulapputigalugit.

- Ulapeqaanga, naatsorsuutigisannit ulapinneroqaanga, aamma suli nammineq pisiniarfiuteqannginnera, suliakkalu tamaasa angerlarsimaffinni suliarisarnerat eqqarsaatigalugu, Nadja Arnaaraq Kreutzmann oqarpoq, taanna kuultimik pinnersaasiortutut namminersortutut 2022-mi aallartippoq, assammiortaartussallu assammiuuliullugit kingornutanilluunniit pinnersaasiorluni ulapittarpoq.

- Amerlaqisut angajoqqaamik aanakkumiluunniit pinnersaataannik atuerusupput, soorlu assammiuliaralugit, kuultimik pinnersaasiortoq oqarpoq.

Pisiniarfimmik sannaveerartalimmik ammaanissani pilersaarutigaa, piffimmilu ujaqqanik pinnersaasiortunik suleqateqarluni, taakkulu ujaqqanik pinnersaatinik silisaat pinnersaasiamini atortarpai.

Kulturimi isumassarsiortartoq

Nadja Arnaaraq Kreutzmann sannaveerannguartalimmik pisiniarfittaarnissaminut qilanaarpoq, ammarnissaanulli suli ulluliinngilaq. Pisiniarfimmi pinnersaatit ilusilersukkallu piffissami muteerniusumi inuit kulturiannit ileqquinillu isumassarsiffiusut aalajangersimasumik tuniniagassaapput.

- Maannakkorpiaq paffimmiut ujammilluunniit iseerartassaannik assigiinngitsunik mattattut, aromatitullu iibilitut kilitatut, aalisakkatut panertutut paarmaaqqatulluunniit isikkulinnik sanaartorpunga.

- Kalaaliminernik assigiinngitsunik sanaartuleruttorpunga, aamma puiaasaaqqatut konditut isikkulimmik peqassaaq, tassa suut nuannarilluakkavut.

- Sanaartukkani taakkunani ”aromat”-eqassaaq mattammut nakkaalatinneqarsinnaasumik, aamma ”aromamaq”-mik allassimasoqassaaq aromatip allanneratut ilusilimmik, taamaaliorpungalu Knorrimik saqitsaassuteqarumananga. Soorunalumi aamma uloqassaaq.

- Pinnersaatinik sianiippalulaartunik nuannaajallannartunillu sanasarneq nuannareqaara, Nadja Arnaaraq Kreutzmann, unnukkut sanarusaatartoq oqarpoq.

- Unnukkut pinnersaasianik nutaanik sanaartorujoortarneq nuannaraara, ualikkullu inniminnikkanik suliaqartarpunga. Pisiniarfissannimi tuniniagassakka, nioqqutitut tuniniagassat suliarigaangakkit, soqutigisannik suliaqartarpunga, allallu unnukkut nuersaarujoorneranni atuffassisumik tusarnaarujoorlunga pinnersaasiakka sanaartorujoortarpakka, Nadja Arnaaraq Kreutzmann oqarpoq.

Suut tamarmik anersaaqarput

Maannakkut pisisartuminit kuultinik kingornussarsiaminik aatsitseqqilluni nutaamik pinnersaasiassatut inniminnikkamik suliaqarpoq.

- Arnap angutaata, toqusimasup assammiua pinnersaatillu allat aatseqqillugit suliarileruttorpakka, taakkulu maanna nammineq assammiussamittut sanatippai, Nadja Arnaaraq Kreutzmann oqarpoq, taassumalu kuultimik pinnersaasiortutut nammineq periusissaminik nassaarnissani sulissutigalugu, suullu tamarmik anersaaqarnerannik aallaaveqarluni sulisarnini oqaluttuaraa.

- Anersaamik upperisatoqatsinnik ileqqutoqatsinnillu aalajangiusimanninniarsarivunga, tassanilu suut tamarmik anersaaqartut oqartarpugut, taamaammallu kuulti aallaavittut anersaaqartoq aamma upperaara. Inuup anersaavatulli inngitsumik, nammineq anersaaminik, nammineq inuminik, Nadja Arnaaraq Kreutzmann oqarpoq, muteerniusumilli taamaaliorluni ilassutigalugu.

- Una aatsinnialerakku angutaata erinarsuut nuannaarisaa Johnny Cash, “I walk the line” nipittuullugu aatsippara, taamaalillunilu nukissaq pitsaasoq pinnersaammut ilanngutissaaq, nukillu pitsaanngitsoq pinnersaammit peerlugu, Nadja Arnaaraq Kreutzmann oqarpoq.

Kalaallit kuultiat ujaraallu

Pisisartut amerlanertigut assammiussaminni pinnersaatissaminniluunniit kuulti nunatsinneersoq nunatsinnillu ujaqqanik pinnersaasianik atuinissaq kissaatigisarpaat.

 - Assammiorpassuarnik sanasarpunga, tassanilu kuulti nunatsinneersoq nunatsinnillu ujaqqat atorneqarnissaat kissaatigineqartarpoq, Nadja Arnaaraq Kreutzmann oqarpoq.

Kuulti nunatsinneersoq aningaasanngortitaq blå avisimi, qallunaani aningaasanik nioqquteqartuni Facebookimiluunniit tuniniaavinni nassaarisarpai.

- Kuultip nunatsinneersup akia qaffakkiartuinnavippoq, tamatumanilu pigineqartut annikilliartornerat patsisaavoq, taamaammallu aningaasat taamaattut 1.000 kr-eqarsimagaluartut maanna 5.000 kr-t angullugit akeqalerput, taamaammallu kuulti nunatsinneersoq kuultimit nunarsuup sinneraneersumit akisunerujussuuvoq, Nadja Arnaaraq Kreutzmann oqarpoq.

Kuultit aningaasat aatsittarpai, sølvimillu, kanngussammik, sølvimillu minguitsumik 14 imaluunniit 18 karatinngornissaannut akusarlugit.

Kuultimik pinnersaasiortup ujaqqanik pinnersaatissat Salik Kielsenimit Jens Mikkel Flymilluunniit, sunngiffimminni katersillutillu ujaqqanik pinnersaasianik assigiinngitsunik cabochonitut toqqissutulluunniit aligoqqiitut silisisartunit pisiarisarpai.

- Pisisussaq peqatigalugu arnap katissallugu aperisassaata qalipaatit suut nuannarinerai paasiniartarpara, taavalu silisisartut suuteqarnerannik oqaloqatigisarpakka. Cordierit qasiartoq tungujualaartorlu safiritut isikkulik akimullu ersittoq annertuumik piumaneqartarpoq, Nadja Arnaaraq Kreutzmann oqarpoq.

Pisisartut nuannaarnerat

Nadja Arnaaraq Kreutzmannip kuultimit ilusilersuilluni pinnersaasiornermik inuuniuteqarnini, imminermini nukinnik atuinarsinnaasoq inunnullu aalajangersimasunut ilusilersuisarnini nuannareqaa.

- Inuussutigisinnaanera pikkunaqaaq, peqatigisaanilli imminut tatiginera annertoorsuunngilaq, taamaammallu pinnersaasiakka naammassigaangata, pisisartut qanoq qisuariarnissaat annilaangagisarpara. Naak suut tamarmik pissusissamisut ingerlasaraluartut, taamaattoq ernumanalaarsinnaasarpoq, taamaammallu pisisartut sunik kissaateqarnerat paasiumallugu, pisisartumik oqaloqatiginnilluarnissaq pisariaqartarpoq.

Pinnersaatit naammassigaangata pisisartut misigissutsimikkut qisuariartarput.

- Pisisartut qanoq qisuariarnerat takullugu nuannertaqaaq, toqoreersut assammiuinit nutaanik pinnersaatitaarnerminni illartarput, qullilisarput pakkutaarinnittarlutillu, qisuariartarnerallu nukissamillusooq tunisisarpoq. Ilaatigut allaaneq ajorpoq katsorsarluni, tassani toqoreersoq oqaloqatigiissutigineqartarpoq, akuttunngitsumillu toqoreersoq sivisuumik itisuumillu oqaloqatigiissutigineqartarpoq.

- Taamaanngikkaangat ilinniarnerup naammassinerani ajornartorsiumminnilluunniit qaangiisut imminnut tunissutissarsisarput. Nuanneqaaq, Nadja Arnaaraq Kreutzmann oqarpoq.