Lars Emil: Binzeri pisortaq inersimanngitsoq
Folketingimut ilaasortaq Lars-Emil Johanseni Michael Binzerip Kalaallit Nunaanni kammalaatigiiaanneq pillugu oqaaseqaatai sakkortuumik qisuariaatigai.
Kammalaatigiiaannerup iluani atorfinitsitsisarnerup namminersulernissamut takorluukkanut aserorterineranik Michael Binzerip Berlingske Tidendemut oqaaseqaataa pillugu Siumup Folketingimut ilaasortaatitaa Lars-Emil Johansen Michael Binzerimut sakkortuumik isornartorsiuisippaa.
Michael Binzerip oqaatigaa suliffeqarfinni namminersornerullutik oqartussanit pigineqartuni kammalaatigiiaanneq nalinginnaasumik atugaasoq, siulersuisuni ilaasortat partiip qalipaataa malillugu ilaasortanngortinneqartarlutik. Lars-Emil Johansenip maanna piumasaraa, Michael Binzerip isornartorsiuinermini atinik taasisariaqartoq.
– Michael, kinaana oqaluuseriinnarit? Piffissanngunnginnerpa inuit seqajuullutit qallunaat kalaallillu tusagassiorfiitigut utertuarlugit mamarleqattaakkavit atiisa taanissaat, illit imminut kalaallinut isuussutissarsiortuinnaanngitsoq, aammali nunatsinni namminersulernissamik takorluuinermut tamarmut kisiartaallutit annaassisussatut isigiitigalutit?Soorunami atera pitsaanngitsumut sammitillugu taasimavat, Lars-Emil Johansen Michael Binzerimut ammasumik allakkamini allappoq.
– Kisianni aamma tassunga attuumassuteqartissallunga akikippallanngila? Sunniuteqarsimanera qangarsuarli pisimasoq illit saassussinissannut artorpat. Taamaattumik aamma piginneqatigiiffimmmut KNI-mut ukiorpassuarni attuumassuteqarfigisimanngisannut akisussaatinniarsinnaanngilarma.
– Imaluunniit eqqoqqissaartuunissaq soqutaanngila, politikerimik ataasiinnarmilluunniit pisuutissinnaasannik nassaarsinnaaguit? Uanga taassagumma, taavami innuttaasut sooq oqaluttuussinnaanngiligit uanga naalakkersuisunut siulittaasuuninni KNI-p siulersuisuinut ilaasortanngornissat toqqaaqataaffigisimagakku, aammalu naak immaqa pisosrtaanertut atorfeqarnissannut misilittagakippallaaraluartutit Air Greenlandimi atorfinitsinneqarnissat sorsuutiginneqataaffigisimagakku? Kisianni kalaallit nunaannit tunuliaqutaqaravit, uagullu arlaliulluta isumaqarsimavugut, tamanna imminik piginnaaneqarfiusoq pitsaasoq, Lars-Emil Johansen allappoq.