London Mining-tilladelse
London Mining: Isumaqatigiissut pingaarutilimmik angusaqarfiuvoq
Qaqagu London Miningip Isuani saviminissarsiorfiliornissaa aallartissanersoq suli naluneqarpoq
Aatsitassarsioqatigiiffik London Mining Isukasiani saviminissarsiorfimmik sananiarnera aallartinneqalerpoq, ammaaniarnermilu nunani allani ammaaniartut taamaalillutik unammillerlugit. London Miningip Isuani ammaasoqarnissaanut aningaasaliisoqarnissaa neriulluarfigaat.
London Mining Isuani saffiugassamik piiaasinnaanissamut akuerineqarpoq, suliffeqarfiullu ilimagaa ukiuni 15-ini saviminissarsiorfik ammasinnaassasoq. Piiaanissamut isumaqatigiissut London Miningimit Naalakkersuisunillu sisamanngornermi atsioqatigiittoqarpoq. Pisariaqarporli 13 milliardinik aningaasaliisoqarnissaa, taakkulu saviminissarsiorfimmut atorneqassapput. Atsioqatigiittoqareerneraniit aningaasaliisussarsiulernissaq tullinnguutissaaq.
- Maannamut suli nalunarpoq suliffeqarfiit sorliit uunga aningaasaleerusunnersut. Neriulluarfigaarpulli aningaasaliisoqarumaartoq, Isuanimi saffiugassaq pitsassuuvoq, soorlu aamma Kalaallit Nunaanni inuiaqatigiit taamaattut. Nunani allani assinganik aallartitsiniartut innuttaasui taamaanngillat, taamaattumillu aningaasaliiumasussat una neriuuteqarfiginerussagaat ilimagaarput, London Miningimi direktøria Graeme Hossie oqarpoq.
Suliffippassuit
London Miningip naatsorsuutigaa inuit 3.000-tit saviminiliorfiup sananeqarnerani atorneqassasut, saffiugassanillu piiaanermi inuit 750-it missaat atorneqassasut naatsorsuutigalugu.
- Isumaqatigiissut issittumi saviminernik piiaanissami pingaarutilimmik angusaqarfiuvoq, siunissamilu takussutissaajumaarluni ilumut issittumi saviminiliorfimmik taama suliaqarneq iluatsinneqarsinnaasoq, Graeme Hossie oqarpoq.
- Neriuutigaapput inuiaqatigiinnut suliffissanik sanasinnaassalluta. Kalaallinik sulisussanik atorfinitsitisinnaavugut, ilinniarnikkullu qaffakkiartorsinnaallutik, Graeme Hossie oqarpoq.
Taassumalu ilimagaa saviminissarsiorfik ammariarpat nunani avannarliusuni nunat assigiinngitsut uunga suleqataajumaartut.
- Nalunaaruteqarusunngilagut qaqugorpiaq aallartinneqarumaarnersoq. Aallartinnissamut apeqqutaalluinnarput Namminersorlutik Oqartussat kiisalu uunga aningaasaliiumasut qanoq sukkatigisumik aallartikkusunnersut, Graeme Hossie oqarpoq.