London Miningimut akuersissut piffissaq sivikitsoq atorlugu tunniunneqarsinnaavoq
Naalakkersuisunngortussat London Miningimut akuersissut qaammatit pingasut iluanni tunniussinnaassavaat, aatsitassanut politikkimut akisussaasoq Ove Karl Berthelsen oqarpoq
- Issiavinnik 60-inik inissiisimavugut, amerlanerusunilli aallertariaqarsimalluta.
Københavnimi Kalaallit Illuutaanni sulisoq Sæen Thalund Sermitsiaq.AG-mut taamatut oqaluttuarpoq.
Tamanna pivoq inuussutissarsiornermut aatsitassanullu Naalakkersuisup Ove Karl Berthelsenip, Inuit Ataqatigiit, pingasunngormat ammasumik aaqqissuussinermi suliniussuarnut inatsit, suliniussuit, piffissat inuiaqatigiinnullu kinguneqaatissat periarfissallu oqaluttuarimmagit.
Suliniussuit piffissallu
Suliniussuarnut siuarsimanerpaanut, tassa London Miningip Nuup Kangerluani Isukasiani saviminissamik piiaaffissatut pilersaarutaanut aamma Alcoap Maniitsup eqqaani aluminiumik aatsitsivissamut pilersaarutaanut, piffissat apeqqutigineqarmata Ove Karl Berthelsen akivoq Naalakkersuisunngortussat qaammatit pingasut iluanni London Miningimut akuersissut tunniussinnaassagaat. Alcoalu akuerineqarsinnaassasoq ukiut marluk-pingasut iluanni.
Kalaallit Illuutaanni aaqqissuussineq tamanna Politiken-imit, Berlingske-mit, amerikarmiut aallartitaqarfiannit australiamiullu aallartitaqarfiannit malinnaaffigineqarluarpoq. Folketingip Kalaallit Nunaannut ataatsimiititaliaa aamma qaaqquneqarsimavoq, qallunaanilli politikerinik takkuttoqanngilaq.