London Miningip inaarutaasumik aninera
Kinamiut aatsitassarsiortitseqatigiiffiat General Nice, suliffeqarfiutini Luckford View aqqutigalugu London Mining Greenlandimik 2014-imi isumaginnittunngortoq, Namminersorlutik Oqartussat piumasaqaateqarnerisigut piiaasinnaanermut akuersissutaatini utertissimavaa maannalu torersaanissani kisiat amigaatigalugu.
Aatsitassarsiortitseqatigiiffiup London Miningip piiaanissamut pisussaaffini naammassisimannginnamigit akuersissutaatini utertittussanngorpaa. Aatsitassanut naalakkersuisoqarfik decembarimi 2021-mi taama nalunaaruteqarpoq.
Aviisi Sermitsiaq taama allappoq.
Naalakkersuisoqarfimmi pisortap Jørgen Hammeken-Holmip oqaatigaa, aatsitassarsiortitseqatigiiffiup Isukasiata eqqaani, Nuummit avannamut kangimut 150 km-inik ungasitsigisumiittumi pilersaaruteqarfigisamini saliinissani amigaatigiinnaleraa.
- Tamanna inissinniarneqaleruttorpoq oqaloqatigiissutigineqarlunilu, naalakkersuisoqarfiup pisortaa Sermitsiamut oqarpoq.
London Mining Nuup Kangerluani Isukasiani saviminissarsiorfissamik pilersitsinissaminut ukiuni 30-ni atuuttussamik 2013-imi akuersissummik pissarsivoq. Tuluilli taamani aatsitassarsiortitseqatigiiffiata aningaasat aallartitsinissaminut atugassani – 13 milliardit koruunit missaanniittut – pissarsiarinngitsoorpai aappaaguanilu tuluit piiaanissamut akuersissutaatertik Luckford View Limitedimut tunniuppaat, taanna Kinami saviminermik aamarsuarnillu avammut tuniniaasut annersaata General Nice Group Holdingip pigisaraa. Aatsitassarsiortitseqatigiiffik 100-nit amerlanerusunik nalunaarsorsimasunik suliffiuteqarpoq nunani nunanullu immikkoortuini 80-it sinneqartuni aatsitassarsiornermik ingerlataqarluni.
Aviisimi Sermitsiami atuarnerusinnaavutit. Aviisi Sermitsiaq uani pissarsiariuk: