Lynge: Nunatsinni suliffissaaleqilernissamut sillimmasiisarfik?
Sulisoq suliffeerukkaangat sillimmasiisarfimmik aaqqiissummik, suliffeqanngitsup aningaasaqarnikkut sillimmaserneqarnissaanik qulakkeerisumik peqanngilaq. Ikiortissatuaq tassaavoq pisortanit tapiiffigineqarneq. Kalaallit Nunaat suliffissaaleqilernissamut sillimmasiisarfimmik atuutilersitsisoqarsinnaanersoq, Steen Lyngep misissortinniarpaa.
Steen Lynge Upernaakkut Ataatsimiinnissamut aalajangiiffissatut siunnersuummik saqqummiussaqarpoq, Nunatsinni suliffissaaleqilernissamut sillimmasiisarfimmik pilersitsisinnaanermut, sulinermik inuussutissarsiortunut suliffeeruteriasaartunut iluaqutaasinnaasumik Naalakkersuisut tassani misissueqquneqarput.
Nammineq piumassutsimik aaqqiissut
- A-karsi nammineq piumassuseq tunngavigalugu aaqqiineruvoq inuit ataasiakkaat nammineq qinertagaat ilaasortaaffiginiarnerlugu ilaasortaaffigissannginnerluguluunniit. A-kassemi ilaasortaanerup iluaqutissartaraa suliffissaarussimagaanni ingerlaannaq pisortat ikiorsiissutaannik pisartagaqartariaqalinnginnissaq. Taarsiullugu A-karsimit ullormusiaqarneq atuutilissaaq. A-karsip inuiaqatigiit sipaartittarpai A-karsip ingerlannera ullormusiaqartitsisarneralu ilaasortanit aningaasalersorneqarmata, Steen Lynge aalajangiiffissatut siunnersuusiornermini taama tunngavilersuivoq, taanna apriilip pingajuanni siullermeerneqassaaq.
Ataatsimut allaffissorneq
- Suliaqarfinnut assigiinngitsunut agguluineq imaluunniit sulisartunut ataatsimoortumik sullimmasiisarfiliornissaq aaqqiissutigineqarsinnaavoq. Naliginnaasumik suliaqarfinnut agguluineq atorneqartarpoq, ikittunnguugattali immaqa periuseq ataatsimoorussaq atoraanni iluaqutissarsivigineqarsinnaanerussajunnarsivoq. Ataatsimoorussamik sillimmasiisarfiliussagutta assigiinngitsumik akiliuteqartarnissaq, assigiinngitsunik pisartagaqarnissaq il.il. eqqarsaatigineqarsinnaapput. Suliaqarfinnulli agguluisoqassappat misissorneqarsinnaavoq ataatsimoorussamik allaffeqarneq arlaatigut iluaqutissarsivigineqarsinnaanersoq, Steen Lynge isumaqarpoq.
Suliaqartut kattuffii ilaatinneqassapput
Sulisartut ilassinnilluarnissaat pingaaruteqartoq oqaatigaa, kattuffiillu ilisimasaa isumaallu ilanngunneqassasut.
- Kattuffiit aamma misissuinerup aallaqqaataaniit naggataanut suleqataatinneqartariaqarput taamaattumik qitiulluinnarpoq tusarniaavigineqaannannginnissaat, Steen Lynge naqissusiivoq.
Suliffissaaleqilernermut sillimmasiisarfeqalernissamut nassuiaammik suliarinninneq, iluaqutaasussanik ajoqutaasinnaasunillu qulaajaaneq 500.000 koruuninik akeqarnissaa taassuma nalilerpaa.