Maanna misileraalluni inalugalinniartoqarsinnaalerpoq

Inalugallit Asiamut avammut tuniniarlugit naleqangaarsinnaapput. Tamanna tunngavigalugu misileraalluni inalugalinniarnissamut Naalakkersuisut akuersissuteqarput.

Aalisakkerivinni sulisut ukiup qaammataani suliassaqarnissaat naatsorsuutaavoq, tassami naliginnaasumik ukiuunerani sinerissap qanittuani aalisarneq suliassakiffiusarmat. 

TAC 800 tonsinik Naalakkersuisut pilersitsipput, imartanut sisamanut 200 tonsinik assigiimmik agguarneqartussanik sumiiffiit taakku sisamaasut tassaallutik: Attup eqqaa, Sisimiut Avannaa (Kangaarsuk), Sisimiut Kujataatungaa (Saqqaq) aamma Nuup eqqaa.

Ukiup naanissaanut atuuttoq

Misileraalluni inalugalinniarneq ukiup naanissaanut atuuppoq, aalisarnermilu uani atortussat atorneqarsinnaasut tassaapput: (aningaasarsiutigalugu uilunniarnermi angissusaanut assingusumik) immap naqqani kiliortuutit – pooq saviminiusoq saviminiunngitsumik taarserneqarsinnaalluni. Misileraalluni aalisarnermi 100%-imik tulaassisussaatitaapput.

Canadamiut inalugalinnik aalisarnerannit misilittakkat ima pitsaatigilersimapput, Royal Greenlandip Kalaallit Nunaata imartaani inalugalinnik aalisarnerup annertusinissaa aalajangersimallugu, Royal Greenlandimi pisortaanerup Susanne Arfelt Rajamandip siorna decembarimi Sermitsiamut ilisimatitsissutigaa. 

- Aalisakkat nutaat Kalaallit Nunaanni ineriartornermik qulakkeerinninnissamut periarfissaqalersitsissapput. Tamatuma saniatigut aalisakkeriviit pitsaanerusumik ingerlannissaannut periarfissaqalersitsissapput, aalisakkeriviit tamakkiisumik atorneqanngikkaangata aalisakkat nutaat arlallit aalisarneqarsinnaammata, pisortaaneq decembarimi oqaluttuarpoq.

Inalugallit immap naqqa kiliorlugu pisarineqartarput, tamatumalu kingorna immikkoortiterneqartarlutik. Kalaallit Nunaata imartaa inalugalinnik pitsaassusigissunik peqarluartoq, taakkulu Asiami piumaneqarluartuusut, Susanne Arfelt Rajamand oqarpoq.

Misileraalluni aalisarnissani peqataanissamut qinnuteqarusuttut Sullissivikkut qinnuteqarsinnaapput.